Падзеі

Дэпутаты ратыфікавалі дагавор аб гарантыях бяспекі ў СД

26 лютага, Мінск /Кар. БЕЛТА/. Дэпутаты на пасяджэнні другой сесіі Палаты прадстаўнікоў Нацыянальнага сходу восьмага склікання прынялі законапраект "Аб ратыфікацыі Дагавора паміж Рэспублікай Беларусь і Расійскай Федэрацыяй аб гарантыях бяспекі ў рамках Саюзнай дзяржавы", перадае карэспандэнт БЕЛТА.

Дагавор паміж Рэспублікай Беларусь і Расійскай Федэрацыяй аб гарантыях бяспекі ў рамках Саюзнай дзяржавы быў падпісаны ў Мінску 6 снежня 2024 года і накіраваны на ўмацаванне бяспекі Беларусі і Расіі ў рамках агульнай абароннай прасторы Саюзнай дзяржавы і замацаванне ўзаемных гарантый па ажыццяўленні неабходных мер у выпадку замахаў на бяспеку любога з бакоў і Саюзнай дзяржавы ў цэлым.

Дагаворам прадугледжана, што развіццё беларуска-расійскіх двухбаковых адносін у сферы забеспячэння бяспекі не накіравана супраць іншых дзяржаў і будзе ажыццяўляцца ў адпаведнасці з мэтамі і прынцыпамі Статута ААН, іншымі агульнапрызнанымі прынцыпамі і нормамі міжнароднага права.

Дагавор вызначае ўзаемныя абавязацельствы бакоў у сферы абароны і аховы суверэнітэту: нападзенне на адну з краін разглядаецца як агрэсія супраць абедзвюх. У прыватнасці, бакі дамовіліся падтрымліваць адзін аднаго ўсімі ўзгодненымі і дапушчальнымі міжнародным правам спосабамі і сродкамі, а таксама прымаць адпаведныя дзеянні ў палітычнай, ваеннай і іншых сферах у выпадках замахаў на бяспеку любога з бакоў і Саюзнай дзяржавы ў цэлым. Пад такімі замахамі маецца на ўвазе мэтанакіраванае стварэнне або рэалізацыя пагрозы суверэнітэту, незалежнасці і канстытуцыйнаму ладу бакоў, цэласнасці і недатыкальнасці тэрыторыі і знешняй граніцы Саюзнай дзяржавы з боку трэціх дзяржаў і іх аб'яднанняў, міжнародных арганізацый, тэрарыстычных і экстрэмісцкіх арганізацый і груп.

Арт.6 дагавора рэгулюе пытанні прымянення ядзернай зброі Расійскай Федэрацыі, размешчанай у тым ліку на тэрыторыі Рэспублікі Беларусь. Бакі разглядаюць ядзерную зброю як важны фактар прадухілення ўзнікнення ядзерных ваенных канфліктаў і ваенных канфліктаў з прымяненнем звычайных сродкаў паражэння, а таксама як сродак стрымлівання, прымяненне якога з'яўляецца крайняй і вымушанай мерай.

Дагаворам прадугледжваецца таксама магчымасць ініцыявання калектыўнага процідзеяння аднабаковым абмежавальным мерам эканамічнага і іншага характару ў адносінах да любога з бакоў у выпадку іх прымянення трэцімі дзяржавамі і іх аб'яднаннямі, міжнароднымі арганізацыямі.

Ажыццяўленне супрацоўніцтва бакоў у мэтах рэалізацыі дагавора можа рэгулявацца асобнымі пагадненнямі. Бакі дамовіліся, што назначаць спецыяльных прадстаўнікоў, якія будуць сустракацца не радзей за два разы ў год для агляду дзеяння дагавора і распрацоўкі ў выпадку неабходнасці прапаноў па мерах павышэння яго эфектыўнасці для разгляду кіраўнікамі дзяржаў.

Дагавор падлягае ратыфікацыі і заключаецца на 10 гадоў з аўтаматычным прадаўжэннем яго дзеяння на наступныя 10-гадовыя тэрміны.

Савет Рэспублікі ратыфікаваў дагавор аб гарантыях бяспекі ў СД

26 лютага, Мінск /Кар. БЕЛТА/. На пасяджэнні другой сесіі Савета Рэспублікі Нацыянальнага сходу восьмага склікання адобраны праект закона "Аб ратыфікацыі Дагавора паміж Рэспублікай Беларусь і Расійскай Федэрацыяй аб гарантыях бяспекі ў рамках Саюзнай дзяржавы", перадае карэспандэнт БЕЛТА.

Дагаворам устанаўліваюцца агульнапрызнаныя падыходы, прызначаныя прадэманстраваць няўхільнае выкананне яго ўдзельнікамі норм і прынцыпаў міжнароднага права пры выкананні ўзаемных абавязацельстваў у сферы бяспекі.

Дакумент нацэлены на ўмацаванне бяспекі бакоў у рамках агульнай абароннай прасторы Саюзнай дзяржавы і замацоўвае ў якасці ключавой умовы ўзаемныя гарантыі Беларусі і Расіі адна адной па ажыццяўленні неабходных мер у выпадку замахаў на бяспеку любога з бакоў і Саюзнай дзяржавы ў цэлым.

"Дагавор паміж Рэспублікай Беларусь і Расійскай Федэрацыяй аб гарантыях бяспекі ў рамках Саюзнай дзяржавы з'яўляецца надзейным заслонам ад замахаў на граніцы Саюзнай дзяржавы", - адзначыў член Пастаяннай камісіі Савета Рэспублікі па міжнародных справах і нацыянальнай бяспецы Аляксандр Лук'янаў.

Паводле яго слоў, вельмі важна, што гэта работа выбудавана ў літаральным сэнсе сінхронна. "Сёння ў Савеце Федэрацыі Федэральнага сходу Расійскай Федэрацыі быў адобраны гэты законапраект. Важна адзначыць, што дакумент не накіраваны супраць трэціх краін, а мае выключна абарончы характар і падкрэслівае найвышэйшую ступень узаемадаверу паміж Рэспублікай Беларусь і Расійскай Федэрацыяй", - дапоўніў Аляксандр Лук'янаў.

версія для друку

зрабіць стартавай

дабавіць у выбранае