Падзеі

Дапкюнас і Шмід абмеркавалі шляхі павелічэння ўплыву АБСЕ на працэсы на еўрапейскім кантыненце

9 красавіка, Мінск /Аліна Грышкевіч - БЕЛТА/. Пастаянны прадстаўнік Беларусі пры Арганізацыі па бяспецы і супрацоўніцтве ў Еўропе Андрэй Дапкюнас сустрэўся сёння з генеральным сакратаром АБСЕ Хельгай Шмід. Аб гэтым карэспандэнту БЕЛТА паведамілі ў беларускім пастаянным прадстаўніцтве ў Вене.

Беларускі дыпламат і кіраўнік cакратарыята АБСЕ абмяняліся думкамі аб бягучым стане спраў у арганізацыі і абмеркавалі магчымыя шляхі ўзмацнення ролі АБСЕ і павелічэння ўплыву арганізацыі на працэсы, якія адбываюцца на еўрапейскім кантыненце.

Кіраўнік беларускай місіі пры АБСЕ адзначыў, што сур'ёзны крызіс даверу на еўразійска-атлантычнай прасторы сёння не дазваляе ў поўнай меры выкарыстоўваць існуючыя інструменты АБСЕ для развіцця больш шырокага і дружалюбнага міждзяржаўнага супрацоўніцтва.

На думку Андрэя Дапкюнаса, толькі аднаўленне даверу праз мэтанакіраваныя намаганні кіраўнікоў дзяржаў і дыпламатаў як у АБСЕ, так і ў рамках двухбаковых міждзяржаўных кантактаў дазволіць эфектыўна прадухіляць эскалацыю напружанасці ў рэгіёне АБСЕ і паступова аднаўляць дзейсныя механізмы супрацоўніцтва ў галіне ваенна-палітычнага, эканоміка-экалагічнага і чалавечага вымярэнняў бяспекі.

АБСЕ - буйнейшая рэгіянальная міжнародная арганізацыя, якая займаецца пытаннямі бяспекі. Штаб-кватэра арганізацыі знаходзіцца ў Вене (Аўстрыя). У склад АБСЕ ўваходзяць 57 дзяржаў-удзельніц. Вытокі арганізацыі ўзыходзяць да Канферэнцыі па бяспецы і супрацоўніцтве ў Еўропе (1973-1975 гады) і Хельсінкскага заключнага акта, прынятага ў 1975 годзе. У 1995 годзе канферэнцыя перайменавана ў Арганізацыю па бяспецы і супрацоўніцтве.-

версія для друку

зрабіць стартавай

дабавіць у выбранае