Падзеі

"Будзем спрашчаць там, дзе гэта рацыянальна". Лукашэнка аб падыходах да лічбавізацыі штодзённага жыцця

Фота з архiва

18 снежня, Мінск /Кар. БЕЛТА/. Прэзідэнт Беларусі Аляксандр Лукашэнка ў Пасланні беларускаму народу і парламенту абазначыў падыходы да лічбавізацыі, перадае карэспандэнт БЕЛТА.

Прэзідэнт звярнуў увагу на неабходнасць развіцця нацыянальнай IT-індустрыі і асобна спыніўся на лічбавізацыі штодзённага жыцця. "Мы развіваем тэхналогіі электроннага ўрада, ствараем лічбавыя платформы і сэрвісы. Але ці бачны эфект насельніцтву? Ці разумеюць людзі, якія магчымасці адкрываюцца для іх зручнасці? Думаю, не заўсёды і не ўсе", - заўважыў Аляксандр Лукашэнка.

У сувязі з гэтым кіраўнік дзяржавы абазначыў заканамернае пытанне: "Для чаго стваралі Адзіны партал электронных паслуг, калі, акрамя Мінска і абласных цэнтраў, людзі не маюць магчымасці аддалена запісацца да ўрача? Вымушаны ў шэсць раніцы прыязджаць у паліклініку і чакаць па жывой чарзе".

Акрамя таго, адзначыў Прэзідэнт, у Беларусі шмат гарачых тэлефонных ліній, парталаў і сайтаў - ад "Обращения.бел" да чат-ботаў. "А толку? Людзі як хадзілі, так і ходзяць ад адной арганізацыі да іншай", - канстатаваў ён.

Кіраўнік дзяржавы заявіў, што ў Беларусі трэба прапрацаваць магчымасць стварэння адзінай службы, здольнай аператыўна і кампетэнтна рэагаваць на пытанні. "Яна павінна стаць універсальным цэнтрам зваротнай сувязі з насельніцтвам, куды можна звярнуцца і па тэлефоне, і праз інтэрнэт, і асабіста. Такі вопыт ёсць і ў Расіі, і ў Кітаі", - звярнуў увагу Аляксандр Лукашэнка.

Пры гэтым, падкрэсліў беларускі лідар, мэта - не лічбавізацыя дзеля лічбавізацыі. "Калі паслугу адміністраваць даражэй, чым яе рэальная запатрабаванасць, то траціць грошы бессэнсоўна. Будзем спрашчаць там, дзе гэта рацыянальна", - рэзюмаваў ён.

версія для друку

зрабіць стартавай

дабавіць у выбранае