17 лютага, Мінск /Кар. БЕЛТА/. Больш за 30 законапраектаў будзе падрыхтавана і ўнесена ў беларускі парламент у 2015 годзе. Адпаведны план зацверджаны ўказам Прэзідэнта ад 13 лютага нумар 55 і апублікаваны сёння на Нацыянальным прававым інтэрнэт-партале, паведамляе БЕЛТА.
У прыватнасці, сярод дакументаў абазначаны асобны закон "Аб абыходжанні з жывёламі", які павінен быць падрыхтаваны ў маі і ўнесены ў Палату прадстаўнікоў у верасні. На чэрвень намечана падрыхтоўка закона "Аб экспартным кантролі", унясенне ў парламент чакаецца ў кастрычніку. У плане таксама прапісана падрыхтоўка Кодэкса Беларусі аб культуры, унясенне ў парламент запланавана на красавік.
Прадугледжваецца карэкціроўка некаторых дзеючых законаў. Што датычыцца заканадаўства аб абароне, нацыянальнай бяспецы і праваахоўнай дзейнасці, у лістападзе чакаецца ўнясенне ў Палату прадстаўнікоў дакумента, якім прадугледжаны папраўкі ў закон "Аб зацвярджэнні Ваеннай дактрыны Рэспублікі Беларусь" (новая рэдакцыя). У пераліку абазначаны папраўкі ў некаторыя законы па пытаннях папярэджання п'янства, безнагляднасці і правапарушэнняў непаўналетніх.
Акрамя ўсяго іншага, будуць скарэкціраваны законы "Аб эканамічнай неплацежаздольнасці" (тэрмін падрыхтоўкі - снежань, унясенне ў парламент - красавік 2016 года) і "Аб аўтамабільным транспарце і аўтамабільных перавозках" (тэрмін падрыхтоўкі - кастрычнік, унясенне ў парламент - люты 2016 года). У мэтах уніфікацыі крымінальнага заканадаўства дзяржаў - членаў Еўразійскага эканамічнага саюза прадугледжваецца ўнясенне паправак у Крымінальны кодэкс Беларусі.
Асобны блок законапраектаў будзе падрыхтаваны ў адпаведнасці з рашэннямі Прэзідэнта і міжнароднымі дагаворамі Беларусі. Акрамя таго, у плане абазначана паэтапная падрыхтоўка канцэпцыі законапраекта "Аб арганічнай вытворчасці".
Бліжэй да канца года будзе падрыхтаваны і ўнесены ў парламент шэраг дакументаў, якія датычацца рэспубліканскага бюджэту на 2016 год.
Указ уступае ў сілу з дня яго падпісання.