Падзеі

"Белавія" адкрывае прамы рэйс у Кутаісі 4 жніўня

Фота з архiва

20 ліпеня, Мінск /Кар. БЕЛТА/. "Белавія" 4 жніўня выканае першы рэгулярны рэйс па маршруце Мінск - Кутаісі - Мінск, паведамілі БЕЛТА ў прэс-службе авіякампаніі.

Кутаісі стане трэцім грузінскім горадам у карце палётаў "Белавія". Рэйсы будуць выконвацца па серадах і нядзелях з вылетам з Мінска ў 9.35 і прыбыццём у Міжнародны аэрапорт Кутаісі ў 13.35. Рэйсы ў Нацыянальны аэрапорт Мінск плануюцца ў 14.25 з прылётам у сталіцу Беларусі ў 16.30. Час для ўсіх аэрапортаў пазначаны мясцовы. Мінімальны кошт білетаў па тарыфе LIGHT складзе 85 еўра ў адзін бок. Авіябілеты туды - назад абыдуцца ў 169 еўра.

У Кутаісі пасажыры будуць падарожнічаць на паветраным судне Embraer 175, разлічаным на перавозку 76 пасажыраў: 12 месцаў у бізнес-класе і 64 месцы ў эканомкласе. Пры наяўнасці попыту на лініі будуць выкарыстоўвацца больш ёмістыя самалёты. Час у палёце складзе амаль 3 гадзіны.

"Мы заўсёды стараемся быць гібкімі і шукаем магчымасць прапанаваць пасажырам новыя месцы для падарожжаў. Грузія - адзін з самых папулярных напрамкаў цяпер, таму мы вырашылі даць магчымасць нашым пасажырам наведаць яшчэ адзін грузінскі горад - Кутаісі. Размешчаны ў самым сэрцы гасціннай Грузіі Кутаісі гарманічна спалучае ў сабе старажытную і сучасную архітэктуру, спакойнае і актыўнае жыццё. Прыляцеўшы сюды, вы зможаце адчуць атмасферу старадаўніх вулачак і ацаніць грузінскую гасціннасць, бліжэй азнаёміцца з месцам, апісаным у старажытных легендах. Таксама горад можа стаць выдатным пунктам пачатку падарожжа па Грузіі. Пры гэтым кошт білетаў плануецца ніжэйшым, чым у Батумі і Тбілісі ў аналагічны сезон", - адзначыў генеральны дырэктар "Белавія" Ігар Чаргінец.

Авіякампанія "Белавія" - найбуйнейшы авіяперавозчык Беларусі. Створана 5 сакавіка 1996 года. З 1997 года з'яўляецца правадзейным членам Міжнароднай асацыяцыі паветранага транспарту (IATA), з 2010-га - членам Асацыяцыі еўрапейскіх рэгіянальных авіякампаній (ERAA). Флот авіякампаніі на гэты час налічвае 29 паветраных суднаў (адзін Boeing 737-8, дзевяць Boeing 737-800, адзін Boeing 737-500, тры Boeing 737-300, пяць Embraer 175, сем Embraer 195 і тры Embraer 195-E2).

версія для друку

зрабіць стартавай

дабавіць у выбранае