Падзеі

Беларусь зацікаўлена ў прыцягненні егіпецкіх турыстаў

Фота з архiва

17 ліпеня, Мінск /Кар. БЕЛТА/. Беларусь зацікаўлена ў прыцягненні егіпецкіх турыстаў. Аб гэтым заявіў міністр спорту і турызму Сяргей Кавальчук на сустрэчы з міністрам па справах старажытнасцей і турызму Егіпта Халедам аль-Анані, перадае карэспандэнт БЕЛТА.

"У мінулым годзе Егіпет наведалі 258 тыс. беларусаў. Гэта даволі вялікая колькасць. Цяпер гэту статыстыку трэба крыху павярнуць і ў свой бок: каб грамадзяне Егіпта прыязджалі да нас. Пакуль у год крыху больш за тысячу егіпцян прылятаюць у Беларусь", - адзначыў Сяргей Кавальчук.

На яго думку, такі невялікі паток звязаны ў тым ліку з транспартнымі зносінамі. "У нас няма прамога пастаяннага рэйса з Егіптам, таму трэба прапрацаваць гэта пытанне. Было б нядрэнна, каб на гэтым напрамку з'явіліся і лаўкосты", - сказаў міністр.

Сяргей Кавальчук звярнуў увагу, што егіпецкай дэлегацыі ў час візіту пастараюцца прадэманстраваць усе выдатныя якасці Беларусі. "У нас развіваюцца розныя віды турызму: прамысловы, медыцынскі, аграэкатурызм. У краіне добрыя санаторыі, вялікая колькасць спартыўных аб'ектаў, цудоўная інфраструктура", - дадаў ён.

Міністр па справах старажытнасцей і турызму Егіпта ў сваю чаргу расказаў, што гэта адзін з першых яго візітаў за мяжу пасля пандэміі. "Наша асноўная мэта - паказаць, што мы гатовы прыняць турыстаў, - сказаў ён. - Тыя групы турыстаў, якія паспелі пабываць у Егіпце пасля адкрыцця граніц, вярнуліся абсалютна здаровымі. Усім, хто знаходзіцца ў нашай краіне, гарантавана бяспечнае знаходжанне".

Халед аль-Анані адзначыў, у прыватнасці, цікавасць да Беларусі егіпецкага бізнесу: разглядаюцца розныя прапанаванні, прапануюцца туры, вядуцца перагаворы. "Мы вывелі адносіны на міждзяржаўны ўзровень. А лепшыя стасункі паміж нашымі грамадзянамі - гэта, безумоўна, турызм", - рэзюмаваў ён.

Егіпецкая дэлегацыя на чале з міністрам па справах старажытнасцей і турызму Халедам аль-Анані знаходзіцца з двухдзённым афіцыйным візітам у Беларусі. У планах наведванне Нацыянальнага гістарычнага музея, Мінскага трактарнага завода, саборнай мячэці і санаторыя "Юнацтва". Таксама гасцям будзе прапанавана аглядная экскурсія па Мінску. 18 ліпеня адбудзецца прэзентацыя турыстычнага патэнцыялу Беларусі і Егіпта.

версія для друку

зрабіць стартавай

дабавіць у выбранае