Падзеі

Беларусь удзельнічае ў перагаворах па пытаннях работы Міжнароднай арганізацыі па медыяцыі

Фота Мінюста

18 кастрычніка, Мінск /Кар. БЕЛТА/. Беларусь удзельнічае ў перагаворах па пытаннях работы Міжнароднай арганізацыі па медыяцыі, якія праводзяцца з 15 па 18 кастрычніка 2025 года ў Ганконгу, паведамілі БЕЛТА ў Міністэрстве юстыцыі.

Беларусь 30 мая 2025 года ў ліку першых падпісала Канвенцыю аб заснаванні Міжнароднай арганізацыі па медыяцыі. На гэты час выконваюцца ўнутрыдзяржаўныя працэдуры, неабходныя для ўступлення Канвенцыі ў сілу.

Міністэрства юстыцыі Беларусі ў перагаворах прадстаўляе начальнік упраўлення міжнароднага супрацоўніцтва Дзмітрый Тускаль. Ад беларускага боку ў мерапрыемствах прымаюць удзел таксама прадстаўнікі Міністэрства замежных спраў.

У Ганконгу абмяркоўваюцца, у прыватнасці, правілы правядзення медыяцыі па міждзяржаўных спрэчках, міжнародных камерцыйных і інвестыцыйных спрэчках, палажэнне аб рабоце Кіруючага савета, працэдуры адбору і назначэння генеральнага сакратара міжнароднай арганізацыі і яго намеснікаў, палажэнне аб працоўных праваадносінах з супрацоўнікамі сакратарыята арганізацыі.

Цырымонія адкрыцця Міжнароднай арганізацыі па медыяцыі запланавана на 20 кастрычніка 2025 года. У гэты ж дзень пройдзе першае пасяджэнне Кіруючага савета, на якім будуць зацверджаны названыя дакументы.

У Мінюсце адзначылі, што Беларусь паступальна падтрымлівае ініцыятыву кітайскіх партнёраў па стварэнні Міжнароднай арганізацыі па медыяцыі, якая стане першым у гісторыі інстытутам, што спецыялізуецца выключна на медыяцыі для ўрэгулявання міжнародных спрэчак.

Плануецца, што працэдуры арганізацыі будуць задзейнічаны для актывізацыі супрацоўніцтва з дружалюбнымі для Беларусі дзяржавамі Паўднёва-Усходняй Азіі, Афрыкі і Лацінскай Амерыкі і прымяняцца суб'ектамі гаспадарання адпаведных дзяржаў.

версія для друку

зрабіць стартавай

дабавіць у выбранае