Падзеі

Беларусь у бліжэйшы час вызначыцца з кандыдатурай пасла ў ЗША - Макей

28 студзеня, Мінск /Кар. БЕЛТА/.Беларусь заўсёды гатова на плённае і раўнапраўнае ўзаемадзеянне з ЗША. Аб гэтым заявіў сёння журналістам міністр замежных спраў Уладзімір Макей у час пасяджэння Савета пастаянных паўнамоцных прадстаўнікоў дзяржаў - удзельніц СНД, перадае карэспандэнт БЕЛТА.

"Мы заўсёды гаварылі аб тым, што нацэлены на раўнапраўнае, плённае, цеснае, канструктыўнае ўзаемадзеянне, - сказаў Уладзімір Макей. - Мы разумеем, якую ролю адыгрываюць сёння Злучаныя Штаты ў свеце, таму зацікаўлены ў наяўнасці нармальнага, канструктыўнага ўзаемадзеяння з гэтай дзяржавай".

Міністр падкрэсліў, што беларускі бок зацікаўлены ў хутчэйшым прыбыцці пасла ЗША. Таксама ў Беларусі цяпер ідзе пошук новай кандыдатуры на пасаду кіраўніка дыпмісіі ў Вашынгтоне (намеснік міністра замежных спраў Алег Краўчанка, назначаны раней на гэту пасаду, памёр у 2020 годзе). "Цяпер мы працуем над кандыдатурай новага пасла. Ужо некалькі кандыдатур ёсць, мы будзем дакладваць аб нашых прапановах кіраўніку дзяржавы. Думаю, што у бліжэйшы час мы вызначымся з гэтай кандыдатурай", - заявіў Уладзімір Макей.

Ён таксама адзначыў, што з прыходам новай адміністрацыі ЗША з'явіліся пазітыўныя моманты ў расійска-амерыканскіх адносінах у сферы міжнароднай бяспекі. "Усё гэта выклікае пэўны асцярожны аптымізм, і мы, вядома ж, падтрымліваем такія намаганні, якія будуць садзейнічаць большай стабільнасці і спакою ў нашым рэгіёне і свеце", - дадаў міністр.

версія для друку

зрабіць стартавай

дабавіць у выбранае