Падзеі

5 ліпеня, Мінск /Кар. БЕЛТА/. Беларусь распрацоўвае ўдасканалены механізм інфармавання суседніх краін пасля запуску атамнай электрастанцыі ў Астраўцы. Аб гэтым паведаміла намеснік дырэктара Дэпартамента па ядзернай энергетыцы Міністэрства энергетыкі Беларусі Лілія Дулінец сёння на круглым стале "Развіццё атамнай энергетыкі: экалагічныя аспекты і бяспека" ў Мінску, перадае карэспандэнт БЕЛТА.

Канвенцыя аб ацэнцы ўздзеяння на навакольнае асяроддзе ў трансгранічным кантэксце (Канвенцыя Эспа) прадугледжвае постпраектны аналіз. "Гэта значыць пасля ўводу атамнай станцыі ў эксплуатацыю правяраюцца кантралюемыя параметры. Мы гатовы гэтыя даныя прадстаўляць усім краінам-суседзям і жадаючым удзельнічаць у працэдурах Канвенцыі Эспа. Такі праект ужо рыхтуецца. Пасля завозу ядзернага паліва, уводу АЭС у эксплуатацыю будзе дапрацоўвацца механізм, як будуць інфармавацца сумежныя краіны аб нашым праекце, радыяцыйным фоне. Гэта ўсё прадугледжана, такая работа сёння актыўна праводзіцца", - расказала Лілія Дулінец.

Паводле яе слоў, сёння ў краіне з улікам будаўніцтва АЭС вядуцца ўсе віды экалагічнага маніторынгу з прымяненнем самых сучасных сродкаў і абсталявання, і Беларусь гатова дзяліцца вынікамі гэтых назіранняў. "Мы гатовы да дыялогу і з краінамі-суседзямі, і ўнутры краіны", - падкрэсліла Лілія Дулінец.

Беларуская АЭС будуецца па расійскім праекце АЭС-2006 за 18 км ад Астраўца (Гродзенская вобласць). Яна будзе складацца з двух энергаблокаў магутнасцю 1200 МВт кожны. Першы энергаблок плануецца ўвесці ў эксплуатацыю у 2019 годзе, другі - у 2020-м.

Круглы стол "Развіццё атамнай энергетыкі: экалагічныя аспекты і бяспека" праводзіцца Міністэрствам энергетыкі Беларусі.