Падзеі

Беларусь прыхільна да Мэт устойлівага развіцця і прынцыпаў зялёнай эканомікі - Худык

Фота з архiва

27 мая, Мінск /Кар. БЕЛТА/. Беларусь прыхільна да Мэт устойлівага развіцця і прынцыпаў зялёнай эканомікі, адзначыў сёння міністр прыродных рэсурсаў і аховы навакольнага асяроддзя Андрэй Худык падчас круглага стала "Нацыянальныя стратэгіі і праекты ў галіне экалогіі і аховы навакольнага асяроддзя. Абмен вопытам". Аб гэтым БЕЛТА паведамілі ў прэс-службе Мінпрыроды.

"Беларусь прыхільна да Мэт устойлівага развіцця і прынцыпаў зялёнай эканомікі, што пацвярджаецца ўзятымі міжнароднымі абавязацельствамі, а таксама шэрагам прынятых стратэгічных дакументаў. Задае магістральныя напрамкі ў галіне ўстойлівага развіцця Нацыянальная стратэгія ўстойлівага сацыяльна-эканамічнага развіцця да 2035 года. Яе мэтай з'яўляецца дасягненне інклюзіўнага ўстойлівага зялёнага росту ва ўсіх сферах жыццядзейнасці грамадства", - сказаў Андрэй Худык.

Рэалізацыя асноўных задач нацыянальнай стратэгіі дасць магчымасць скараціць выкіды парніковых газаў да 38 працэнтаў да 2035 года, а таксама павялічыць удзельную вагу паверхневых водных аб'ектаў з добрым і выдатным экалагічным статусам да 100 працэнтаў. Акрамя таго, чакаецца зніжэнне інтэнсіўнасці ўтварэння адходаў вытворчасці на адзінку ВУП і змяншэнне плошчы парушаных зямель на 72 працэнты (з 3,6 тыс. га па стане на 1 студзеня 2020 года да 1 тыс. га да 2035 года). У Праграме сацыяльна-эканамічнага развіцця Рэспублікі Беларусь на 2021-2025 гады экалагізацыя прамысловасці і развіццё цыркулярнай эканомікі вызначаны ў якасці неабходных умоў дасягнення доўгатэрміновых мэтавых арыенціраў.

"Па ўсіх напрамках дзейнасці Мінпрыроды распрацаваны і рэалізуюцца больш за 10 стратэгій. Водная стратэгія, стратэгіі па захаванні і ўстойлівым выкарыстанні біялагічнай разнастайнасці, захаванні і рацыянальным выкарыстанні тарфянікаў, развіцці сістэмы асабліва ахоўных прыродных тэрыторый і іншыя. Па многіх з іх распрацаваны нацыянальныя планы дзеянняў", - падкрэсліў міністр.

Міністр звярнуў увагу на тое, што ў зялёным будаўніцтве акцэнт зроблены на энергазберагальных рашэннях, тэхналогіях разумнага дома, уключаючы ўзвядзенне электрадамоў. "Рэалізаваны таксама праекты па аднаўленні асушаных тарфянікаў, процідзеянні дэградацыі зямель, ахове ландшафтнай і біялагічнай разнастайнасці, экалагічна бяспечным абясшкоджванні стойкіх арганічных забруджвальнікаў. Прыярытэты развіцця зялёнай эканомікі ў Беларусі да 2025 года - гэта развіццё электратранспарту і гарадской мабільнасці, энергетыкі, уключаючы новыя віды экалагічна чыстай энергіі, устойлівае спажыванне і вытворчасць, інавацыйныя зялёныя і лічбавыя тэхналогіі, устойлівы экалагічны турызм", - прадоўжыў ён.

"Цяпер важна якасная рэалізацыя сумеснага праекта міжнароднай тэхнічнай дапамогі "Развіццё экалагічнага турызму для садзейнічання зялёнаму пераходу да інклюзіўнага і ўстойлівага росту". Пілотнымі аб'ектамі на працягу бліжэйшых трох гадоў будуць рэспубліканскія заказнікі "Чырвоны Бор" і "Асвейскі", якія мяжуюць з Расійскім нацыянальным паркам "Себежскі", - расказаў Андрэй Худык.

Яшчэ адным са стратэгічных напрамкаў супрацоўніцтва ў сферы зялёных тэхналогій і аховы навакольнага асяроддзя з'яўляецца скарачэнне спажывання аднаразовага пластыку. "Адной з рэзультатыўных мер павінна стаць прыняцце змянення нумар 4 у тэхнічны рэгламент Мытнага саюза "Аб бяспецы ўпакоўкі", адказным распрацоўшчыкам якога з'яўляецца Беларусь. Дарэчы, з 20 красавіка па 23 чэрвеня гэтага года на афіцыйным сайце Еўразійскага эканамічнага саюза праходзіць яго публічнае абмеркаванне. Важна для краін - удзельніц ЕАЭС выпрацаваць адзіную пазіцыю па гэтым пытанні, што дасць магчымасць аб'яднаць інтэграцыйныя намаганні па стварэнні і выкарыстанні зялёных тэхналогій і мадэлей цыркулярнай эканомікі. Гэта будзе садзейнічаць устанаўленню адзіных абавязковых патрабаванняў да прадукцыі і стварэнню эфектыўнага механізма абароны агульнага рынку ад небяспечных адносна аховы навакольнага асяроддзя вырабаў", - дадаў міністр.

версія для друку

зрабіць стартавай

дабавіць у выбранае