Падзеі
Беларусь прапануе афрыканскім краінам супрацоўнічаць у сферы паслуг, АПК і машынабудаванні
Фота з архiва
9 снежня, Мінск /Кар. БЕЛТА/. Беларусь прапануе афрыканскім краінам супрацоўніцтва ў сферы паслуг, аграпрамысловым комплексе і машынабудаванні. Аб гэтым паведаміў карэспандэнту БЕЛТА старшыня Беларускай гандлёва-прамысловай палаты Уладзімір Улаховіч пасля відэаканферэнцыі "Афрыка - Беларусь: бягучая сітуацыя і новыя арыенціры для сумесных бізнес-праектаў".
"З Афрыкай у нас нядрэнная гісторыя супрацоўніцтва, і наша партнёрства год за годам паступова прырастае. Хоць гэты год не паказальны, але тым не менш у 2020 годзе беларускія прадукты з'явіліся на новых рынках афрыканскіх краін. З Егіптам даволі дынамічнае ўзаемадзеянне", - адзначыў кіраўнік БелГПП.
Паводле слоў Уладзіміра Улаховіча, для Беларусі з пункту гледжання бізнесу ёсць тры асноўныя напрамкі супрацоўніцтва з краінамі Афрыкі. "Першы - гэта тое, што датычыцца машынабудавання і развіцця адпаведнай інфраструктуры. У Егіпце, напрыклад, у нас ёсць зборачная вытворчасць беларускай тэхнікі, з шэрагам іншых краін таксама ідзе абмеркаванне аналагічных пытанняў. Другі напрамак - гэта ўсё, што звязана з вытворчасцю прадуктаў харчавання, аграрнымі тэхналогіямі, сельгастэхнікай. У гэтым Беларусь гатова прапанаваць поўны пакет паслуг сваім партнёрам з Афрыкі", - расказаў старшыня палаты. Што датычыцца трэцяга напрамку супрацоўніцтва, гэта, на думку кіраўніка БелГПП, сфера паслуг, а менавіта адукацыя, медыцына, ІТ-тэхналогіі.
"Акрамя таго, Афрыка вельмі багатая на карысныя выкапні, там багацейшыя паклады, пачынаючы ад урана і заканчваючы нафтай, і гэта ўсё нацыянальны здабытак афрыканскіх краін, але ім патрэбны партнёры, каб распрацоўваць здабычу. І ў гэтым напрамку яны вельмі адкрытыя да партнёрства з Беларуссю", - паведаміў ён.
Гаворачы аб сённяшняй відэаканферэнцыі, Уладзімір Улаховіч адзначыў: запланаваны форум быў даўно, але першапачаткова яго хацелі прымеркаваць да выстаўкі "Белагра". Правесці яго планавалася ў дзвюх частках. "Меркавалася, што першапачаткова будзе прадстаўлены беларускі патэнцыял афрыканскім партнёрам, а потым мы планавалі прадаставіць магчымасць афрыканскім зацікаўленым краінам паказаць прэзентацыю для нашага бізнесу. Але, на жаль, пандэмія нам гэта не дазволіла ажыццявіць. Аднак мы ўсё ж вырашылі правесці форум у анлайн-фармаце. Так, у лістападзе мы правялі беларускую частку мерапрыемства з удзелам нашых дыпламатаў, а цяпер былі прадстаўлены прэзентацыі дзевяці афрыканскіх краін, а ўсяго з намі на сувязі былі прадстаўнікі 17 пасольстваў", - расказаў старшыня палаты.
Сёння для ўдзелу ў відэаканферэнцыі зарэгістраваліся больш за 200 беларускіх прадпрыемстваў, ад іх паступіла больш за 200 пытанняў, прапаноў і праектаў. "Частку пытанняў ужо мы паспелі перадаць прадстаўнікам канкрэтных краін. Тыя, што паступілі сёння на працягу семінара, мы яшчэ апрацуем і перададзім зацікаўленым асобам, каб ні адна прапанова і ні адзін запыт нашых прадпрыемстваў не зніклі", - дадаў Уладзімір Улаховіч.
версія для друку
зрабіць стартавай
дабавіць у выбранае