Падзеі

Беларусь прапанавала Судану садзейнічанне ў пасляканфліктным аднаўленні краіны

Фота МЗС

26 верасня, Мінск /Кар. БЕЛТА/. Беларусь і Судан абмеркавалі перспектывы аднаўлення комплекснага супрацоўніцтва ў ключавых сферах. Размова аб гэтым ішла на сустрэчы міністра замежных спраў Беларусі Максіма Рыжанкова з міністрам замежных спраў Рэспублікі Судан Махідзінам Салемам у Нью-Ёрку, паведамілі БЕЛТА ў прэс-службе беларускага знешнепалітычнага ведамства.

Субяседнікі выказалі гатоўнасць актывізаваць двухбаковы дыялог на ўсіх узроўнях, уключаючы ўзаемадзеянне паміж профільнымі міністэрствамі.

"Беларусь пацвердзіла падтрымку суверэнітэту і тэрытарыяльнай цэласнасці Судана. Закрануты перспектывы аднаўлення комплекснага супрацоўніцтва ў ключавых сферах: харчовая бяспека, прамысловасць, энергетыка, адукацыя і ахова здароўя", - расказалі ў прэс-службе МЗС.

Максім Рыжанкоў заявіў аб гатоўнасці Беларусі садзейнічаць пасляканфліктнаму аднаўленню краіны, уключаючы пастаўкі прамысловай і сельскагаспадарчай прадукцыі, выкарыстанне беларускага тэхналагічнага патэнцыялу, умацаванне кааперацыйных сувязей.

На палях 80-й сесіі Генеральнай Асамблеі ААН кіраўнік беларускага знешнепалітычнага ведамства таксама правёў сустрэчу з намеснікам міністра эканомікі і міжнароднага супрацоўніцтва Дамініканскай Рэспублікі Уга Рывера Фернандэсам. Яны абмеркавалі перспектывы развіцця двухбаковых адносін, пытанні харчовай бяспекі, супрацоўніцтва ў сферы турызму, у прыватнасці арганізацыю адпачынку беларускіх грамадзян у Дамініканскай Рэспубліцы.

У час размовы з міністрам замежных спраў Узбекістана Бахціёрам Саідавым абмеркаваны ўвесь комплекс адносін паміж краінамі, уключаючы ўзаемадзеянне ў міжнародных арганізацыях.

версія для друку

зрабіць стартавай

дабавіць у выбранае