Падзеі

Беларусь пацвярджае гатоўнасць і далей уносіць уклад у намаганні АБСЕ па барацьбе з антысемітызмам

6 лютага, Мінск /Кар. БЕЛТА/. Беларуская дэлегацыя на чале з намеснікам міністра замежных спраў Алегам Краўчанкам 5-6 лютага ў Браціславе прыняла ўдзел у арганізаванай дзеючым славацкім старшынствам Канферэнцыі АБСЕ па пытаннях барацьбы з антысемітызмам у рэгіёне АБСЕ. Аб гэтым БЕЛТА паведамілі ў прэс-службе МЗС Беларусі.

У сваім выступленні на пленарным пасяджэнні канферэнцыі намеснік міністра інфармаваў аб прыкладаемых у Беларусі разнапланавых намаганнях у сферы захавання гістарычнай памяці аб трагедыі Халакосту, уключаючы адкрыццё ў 2018 годзе другой чаргі мемарыяльнага комплексу "Трасцянец". Асаблівы акцэнт быў зроблены на важнасці вывучэння ўрокаў гісторыі Другой сусветнай вайны і асветы, асабліва моладзі, каб пазбегнуць паўтарэння такіх трагічных падзей у будучым. "Алег Краўчанка падкрэсліў гатоўнасць Беларусі і далей уносіць уклад у калектыўныя намаганні АБСЕ па барацьбе з антысемітызмам", - праінфармавалі ў знешнепалітычным ведамстве.

У мерапрыемстве таксама прынялі ўдзел дзеючы старшыня АБСЕ, міністр замежных спраў Славакіі Міраслаў Лайчак, кіраўнік знешнепалітычнага ведамства Аўстрыі Карын Кнайсль, генеральны сакратар АБСЕ Томас Грэмінгер, афіцыйныя прадстаўнікі шэрага дзяржаў - удзельніц АБСЕ, няўрадавых арганізацый, нацыянальных і рэлігійных абшчын.

У час візіту ў Славакію Алег Краўчанка сустрэўся з дзяржаўным сакратаром Міністэрства замежных і еўрапейскіх спраў Славакіі Лукашам Парызекам. Бакі абмеркавалі шырокі спектр пытанняў супрацоўніцтва ў АБСЕ, а таксама ўзаемадзеяння Беларусі з Еўрапейскім саюзам.

Фота МЗС

На палях канферэнцыі намеснік міністра правёў сустрэчы з асабістым прадстаўніком дзеючага старшыні АБСЕ па барацьбе з антысемітызмам Эндру Бейкерам, намеснікам міністра замежных спраў Албаніі, якая будзе старшынстваваць у АБСЕ пасля Славакіі, Артэміс Дралё, кіраўнікамі дэлегацый шэрага дзяржаў - удзельніц АБСЕ.

На сустрэчы з дырэктарам Славацкай асацыяцыі знешняй палітыкі Аляксандрам Дулебам былі абмеркаваны сітуацыя ў галіне рэгіянальнай бяспекі і перспектывы ўзаемадзеяння паміж аналітычнымі цэнтрамі Беларусі і Славакіі.

версія для друку

зрабіць стартавай

дабавіць у выбранае