Падзеі

31 студзеня, Мінск /Кар. БЕЛТА/. Беларусь на пасяджэнні Форуму па супрацоўніцтве ў галіне бяспекі АБСЕ ў Вене пацвердзіла зацікаўленасць у міжнародным дыялогу, паведамілі БЕЛТА ў прэс-службе Міністэрства абароны.

У пасяджэнні прыняў удзел першы намеснік начальніка дэпартамента міжнароднага ваеннага супрацоўніцтва Міністэрства абароны палкоўнік Валерый Равенка. Мерапрыемства было прысвечана пытанням міжнароднага дыялогу ў сферы бяспекі, а таксама праблематыцы садзейнічання транспарэнтнасці, абмену ваеннай інфармацыяй і зніжэння рызык бяспекі.

Валерый Равенка выступіў з дакладам аб важнасці транспарэнтнасці і надзейнасці ваеннай інфармацыі, у якім прадставіў нацыянальную пазіцыю ў галіне мер умацавання даверу і бяспекі, а таксама пацвердзіў зацікаўленасць Беларусі ў прадаўжэнні актыўнага ўдзелу ў дыялогу ў рамках АБСЕ.