Падзеі

26 мая, Мінск /Кар. БЕЛТА/. У Барнауле сёння прайшло чацвёртае пасяджэнне двухбаковай камісіі па каардынацыі супрацоўніцтва паміж Беларуссю і Алтайскім краем пад старшынствам першага намесніка міністра замежных спраў Беларусі Аляксандра Міхневіча і першага намесніка губернатара края Сяргея Локцева. Аб гэтым БЕЛТА паведамілі ў прэс-службе МЗС.

"У час пасяджэння абмяркоўваўся стан і перспектывы супрацоўніцтва Беларусі і Алтайскага края ў сферах вытворчай кааперацыі, аграпрамысловага комплексу, паставак сельгастэхнікі і пасажырскага транспарту, адукацыі, турызму. Па выніках пасяджэння падпісаны пратакол, які змяшчае мерапрыемствы па пашырэнні ўзаемавыгаднага супрацоўніцтва", - адзначылі ў прэс-службе.

Візіт дэлегацыі Беларусі пад кіраўніцтвам першага намесніка МЗС Аляксандра Міхневіча ў Алтайскі край Расіі праходзіць 25-27 мая. У час візіту беларуская дэлегацыя таксама наведала прадпрыемствы, на якіх ажыццяўляецца зборка беларускай тэхнікі.