Падзеі

Беларусь і Зімбабвэ ў ходзе дзяржаўнага візіту Лукашэнкі падпісалі пакет дакументаў

31 студзеня, Харарэ /Кар. БЕЛТА/. Беларусь і Зімбабвэ ў ходзе дзяржаўнага візіту Аляксандра Лукашэнкі падпісалі пакет дакументаў, перадае карэспандэнт БЕЛТА.

У прысутнасці кіраўнікоў дзяржаў падпісаны пагадненні аб заахвочванні і ўзаемнай абароне інвестыцый, аб стварэнні сумеснай пастаяннай камісіі па супрацоўніцтве.

Заключаны мемарандум аб узаемаразуменні паміж Рэспублікай Беларусь і Рэспублікай Зімбабвэ аб узаемным прызнанні дакументаў аб адукацыі.

Падпісана міжурадавае пагадненне аб прадухіленні двайнога падаткаабкладання і папярэджанні ўхілення ад выплаты падаткаў адносна падаткаў на даходы і маёмасць.

Яшчэ адно пагадненне - аб устанаўленні пабрацімскіх адносін паміж гарадамі Мінск і Харарэ.

Заключаны кантракты паміж кампаніяй "Афтрэйд DMСС" і ўрадам Зімбабвэ на пастаўку беларускай трактарнай і збожжаўборачнай тэхнікі, а таксама на пастаўку абсталявання беларускай вытворчасці для будаўніцтва і мадэрнізацыі комплексаў захоўвання збожжа.

Падпісаны мемарандум аб узаемаразуменні аб супрацоўніцтве ў рамках паставак у Рэспубліку Зімбабвэ машын і абсталявання беларускай вытворчасці для лясной прамысловасці.

"Сёння мы падпісалі пагадненне аб стварэнні сумеснай пастаяннай камісіі па супрацоўніцтве Беларусі і Зімбабвэ, а таксама шэраг іншых двухбаковых пагадненняў і мемарандумаў. Іх ужо каля 20. Патэнцыял нашага ўзаемадзеяння вялікі. І я ўпэўнены, рэгулярныя прамыя кантакты рознага ўзроўню дадуць магчымасць раскрыць яго найлепшым чынам. Дадаткова дамовіліся, што мы ствараем асобныя групы спецыялістаў па развіцці сельскай гаспадаркі і абароны", - паведаміў Аляксандр Лукашэнка.

"Калі зімбабвійскаму боку будзе цікава стварэнне сумесных вытворчасцей у Зімбабвэ і ў Беларусі, мы гатовы на гэта ісці. Атрымліваючы сыравіну з Зімбабвэ, мы будзем разам з вашымі спецыялістамі перапрацоўваць гэту сыравіну на прадпрыемствах у Беларусі. І такім чынам дзяліць адпаведны прыбытак. Таксама мы вітаем уваходжанне зімбабвійскага капіталу ў капітал нашых прадпрыемстваў, - сказаў беларускі лідар. - Мы таксама не выключылі з Прэзідэнтам работу па бартарных схемах. І для гэтага будзе створана спецыяльная група спецыялістаў, якая вызначыць адпаведныя тавары".

Як паведамлялася, напярэдадні ў Харарэ прайшоў двухбаковы бізнес-форум, на якім таксама быў заключаны шэраг дамоўленасцей.

версія для друку

зрабіць стартавай

дабавіць у выбранае