Падзеі

Беларусь і Лаос адмяняюць візы для ўладальнікаў нацыянальных пашпартоў

Фота МЗС

17 ліпеня, Мінск /Кар. БЕЛТА/. Беларусь і Лаос адмяняюць візы для ўладальнікаў нацыянальных пашпартоў. Адпаведнае міжурадавае пагадненне было падпісана ў час візіту міністра замежных спраў Беларусі Максіма Рыжанкова ў Лаос, паведамілі БЕЛТА ў прэс-службе МЗС.

У першы дзень візіту Максім Рыжанкоў правёў перагаворы з міністрам замежных спраў Лаоса Тхангсаванам Фамвіханам. Цэнтральнай падзеяй сустрэчы стала падпісанне міжурадавага пагаднення аб адмене віз для ўладальнікаў нацыянальных пашпартоў.

"Гэты крок адкрые новыя перспектывы для развіцця двухбаковых сувязей у розных сферах: ад дзелавога партнёрства і ўзаемадзеяння грамадскіх арганізацый да турызму і гуманітарных ініцыятыў", - заявілі ў ведамстве.

У час размовы міністры адзначылі ўстойлівую пазітыўную дынаміку беларуска-лаоскіх адносін, заснаваную на трывалых гістарычных сувязях, якія ўзыходзяць да савецкага перыяду.

Нягледзячы на геаграфічную аддаленасць, бакі выказалі імкненне да далейшага паглыблення партнёрства, заснаванага на ўзаемнай павазе і дружбе. Дасягнута дамоўленасць аб перазапуску дзейнасці сумеснай міжурадавай камісіі па гандлёва-эканамічным супрацоўніцтве пасля завяршэння адміністрацыйнай рэформы ў Лаосе, а таксама аб правядзенні яе чацвёртага пасяджэння ў бліжэйшы час.

"Асаблівая ўвага была ўдзелена актывізацыі палітычных кансультацый на ўзроўні намеснікаў міністраў замежных спраў, што дасць магчымасць правесці рэвізію і актуалізацыю бягучых ініцыятыў. Абмяркоўваліся пытанні гандлёва-эканамічнага ўзаемадзеяння, уключаючы рэалізацыю дамоўленасцей, дасягнутых прэзідэнтамі Беларусі і Лаоса ў Казані ў кастрычніку 2024 года на палях саміту БРІКС. Абодва бакі падкрэслілі неабходнасць дыверсіфікацыі тавараабароту, устаранення бар'ераў у банкаўскай сферы і пошуку новых фінансавых інструментаў. Таксама былі разгледжаны шляхі сумеснай работы ў галіне забеспячэння харчовай бяспекі", - расказалі ў прэс-службе.

Дыпламаты таксама абмяняліся думкамі па міжнародным і рэгіянальным парадку дня, адзначыўшы падабенства падыходаў да фарміравання справядлівага і шматпалярнага светаўладкавання. Бакі пацвердзілі значнасць узаемнай падтрымкі на пляцоўцы ААН і абмеркавалі механізмы пашырэння супрацоўніцтва ў інтэграцыйных аб'яднаннях - ЕАЭС і АСЕАН.

Кіраўнік беларускага знешнепалітычнага ведамства падзякаваў лаоскаму боку за падтрымку беларускіх ініцыятыў, у прыватнасці ў сферы барацьбы з гандлем людзьмі, і праінфармаваў аб маючай адбыцца трэцяй Мінскай міжнароднай канферэнцыі па еўразійскай бяспецы, намечанай на кастрычнік 2025 года. Лаос атрымаў запрашэнне прадставіць уласнае бачанне ў кантэксце ініцыятывы па Хартыі Еўразійскай бяспецы.

версія для друку

зрабіць стартавай

дабавіць у выбранае