Падзеі

28 сакавіка, Мінск /Кар. БЕЛТА/. Беларусь і кітайская правінцыя Хубэй дамовіліся пашыраць супрацоўніцтва. Адпаведнае пагадненне дасягнута па выніках сустрэчы парламенцкай дэлегацыі Беларусі з намеснікам старшыні Пастаяннага камітэта Сходу народных прадстаўнікоў правінцыі Хубэй Ван Лінь, паведамілі БЕЛТА ў прэс-службе Савета Рэспублікі.

Правінцыя Хубэй зацікаўлена ў сумесных з беларускім бізнесам праектах у сферы машынабудавання, транспарту, металургіі, вытворчасці лазернага абсталявання. "Наша правінцыя - буйны цэнтр машынабудавання Кітая, дзе штогод вырабляецца больш за 3 млн адзінак аўтатранспарту, - адзначыла Ван Лінь. - Прыкладам паспяховага партнёрства з Беларуссю ў прамысловасці стала стварэнне сумеснага прадпрыемства "Волат-Санцзян", якое спецыялізуецца на выпуску гідраўлічнага абсталявання. Хацелася б, каб такіх праектаў было больш". Сярод магчымых напрамкаў супрацоўніцтва названа вытворчасць высакаскораснага чыгуначнага транспарту.

Паспяховым можа стаць узаемадзеянне бакоў у сельскай гаспадарцы. "У правінцыі Хубэй вельмі любяць беларускія малочныя прадукты і сокі. У нас таксама ёсць што прапанаваць. Напрыклад, па вытворчасці прэснаводнай рыбы наша правінцыя займае першае месца ў Кітаі", - сказала Ван Лінь.

Акрамя таго, правінцыя Хубэй зацікаўлена развіваць супрацоўніцтва ў галіне навукі і інавацый, адукацыі, культуры, турызму. "Мы будзем рады партнёрству з дзелавымі коламі Беларусі. Са свайго боку гатовы зрабіць усё неабходнае, каб развіваць наша супрацоўніцтва", - падкрэсліла яна.

Старшыня Пастаяннай камісіі Палаты прадстаўнікоў па прамысловасці, паліўна-энергетычным комплексе, транспарце і сувязі Андрэй Рыбак ад імя парламенцкай дэлегацыі падзякаваў за сустрэчу. Ён падтрымаў ініцыятыву аб пашырэнні ўзаемавыгаднага супрацоўніцтва з правінцыяй Хубэй і прапанаваў кампаніям стаць рэзідэнтамі Кітайска-беларускага індустрыяльнага парка "Вялікі камень". Асаблівая ўвага была ўдзелена магчымасці партнёрства двух бакоў у сферы адукацыі і моладзі.

У час рабочай паездкі ў Кітай беларускія парламентарыі 28 сакавіка наведалі таксама кітайскую кампанію СRSIC (China Railway Science & Industry Group Corporation), дзе абмеркавалі магчымыя напрамкі партнёрства.