3 мая, Мінск /Кар. БЕЛТА/. Перспектывы пашырэння гандлёва-эканамічнага і інвестыцыйнага супрацоўніцтва паміж Беларуссю і Германіяй абмяркоўваліся 2 мая на сустрэчы першага намесніка міністра эканомікі Беларусі Дзмітрыя Крутога з членам камітэта па эканоміцы і энергетыцы Бундэстага Германіі Маркам Хаўптманам. Такая інфармацыя размешчана на сайце Мінэканомікі, паведамляе БЕЛТА.
"Удзельнікі сустрэчы абмеркавалі актуальны стан і перспектывы двухбаковага ўзаемадзеяння, а таксама магчымасці для пашырэння гандлёва-эканамічнага і інвестыцыйнага супрацоўніцтва паміж Беларуссю і Германіяй. Прадметам абмеркавання сталі ход рэалізацыі інвестыцыйных праектаў і патэнцыяльныя сферы двухбаковага ўзаемадзеяння", - гаворыцца ў паведамленні.