Падзеі

Амбразевіч: санкцыі - сур'ёзны выклік на шляху дасягнення Мэт устойлівага развіцця

Фота mfa.gov.by

13 мая, Мінск /Кар. БЕЛТА/. Санкцыі з'яўляюцца сур'ёзным выклікам на шляху дасягнення Мэт устойлівага развіцця. Гэта падкрэсліў намеснік міністра замежных спраў Беларусі Юрый Амбразевіч на сустрэчы з рэгіянальным дырэктарам па Еўропе і Цэнтральнай Азіі Упраўлення ААН па каардынацыі дзейнасці ў мэтах развіцця Гві Ёп Сон, паведамілі БЕЛТА ў прэс-службе МЗС.

Прадстаўнік ААН высока ацаніла эфектыўную арганізацыю работы на нацыянальным узроўні па дасягненні Мэт устойлівага развіцця. Паводле слоў Гві Ёп Сон, вопыт Беларусі ў гэтым пытанні можа служыць прыкладам для многіх іншых дзяржаў - членаў ААН. Юрый Амбразевіч у сваю чаргу адзначыў важнасць прадаўжэння цесных партнёрскіх адносін Беларусі з усімі агенцтвамі ААН для ўдасканалення нацыянальнай сістэмы развіцця, міжнароднага тэхнічнага супрацоўніцтва і рэалізацыі глабальных ініцыятыў. Намеснік міністра падкрэсліў прыхільнасць Беларусі да рэалізацыі Парадку дня ў галіне ўстойлівага развіцця на перыяд да 2030 года, што пацвярджаюць высокія краінавыя рэйтынгі па дасягненні МУР.

"Адначасова Юрый Амбразевіч звярнуў увагу на адзін з сур'ёзных выклікаў на шляху дасягнення Мэт устойлівага развіцця, якім з'яўляюцца аднабаковыя прымусовыя меры, або санкцыі, што ўводзяцца краінамі Захаду супраць непажаданых ім дзяржаў, уключаючы Беларусь. Адзначана, што правядзенне саміту ААН па Мэтах устойлівага развіцця, запланаванага на верасень 2023 года на палях Генеральнай асамблеі, павінна стаць пляцоўкай для сумленнага абмеркавання праблем негатыўнага ўздзеяння санкцый на перспектывы глабальнага сацыяльна-эканамічнага і экалагічнага развіцця", - паведамілі ў прэс-службе МЗС.

Як паведамлялася, генеральны сакратар ААН Антоніу Гутэрыш запрасіў Прэзідэнта Беларусі Аляксандра Лукашэнку прыняць удзел у саміце па Мэтах устойлівага развіцця. Аляксандр Лукашэнка накіраваў Антоніу Гутэрышу пісьмо ў адказ: "Мінск у поўнай меры вітае гэту ініцыятыву. Лічым, што маючае адбыцца мерапрыемства - добрая магчымасць падвесці прамежкавыя вынікі нашых агульных намаганняў. Рэспубліка Беларусь цалкам прыхільна да дасягнення Мэт устойлівага развіцця, яны эфектыўна інтэграваны ў нашы нацыянальныя стратэгічныя дакументы".

Кіраўнік дзяржавы таксама падкрэсліў важнасць таго, каб саміт стаў крыніцай ідэй і ініцыятыў, якія садзейнічаюць устараненню праблем на шляху дасягнення МУР: "Вы цалкам правільна адзначылі, што "шматлікія крызісы апошніх трох гадоў нанеслі сур'ёзны ўдар па намаганнях, накіраваных на выкананне Парадку дня-2030". Сёння відавочна, што без міру не можа быць устойлівага развіцця на планеце. Я сказаў гэтыя словы яшчэ ў 2015 годзе, выступаючы на Саміце ААН, на якім былі прыняты Мэты ўстойлівага развіцця. Вамі таксама неаднаразова агучвалася падобная думка".

версія для друку

зрабіць стартавай

дабавіць у выбранае