Падзеі

Алімпіяды, сумесныя праграмы і навука: што ўключае супрацоўніцтва Беларусі і Расіі ў адукацыі

Фота з архiва

11 студзеня, Мінск /Кар. БЕЛТА/. У падпісаным 10 студзеня плане мерапрыемстваў па развіцці супрацоўніцтва ў 2023-2024 гадах паміж Міністэрствам адукацыі Беларусі і Міністэрствам асветы Расіі вызначаны такія важныя напрамкі, як правядзенне алімпіяд і развіццё навукі сярод навучэнцаў, паведамілі БЕЛТА ў прэс-службе Мінадукацыі.

План прадугледжвае падрыхтоўку і рэалізацыю праграмы супрацоўніцтва паміж Нацыянальным дзіцячым тэхнапаркам і адукацыйным цэнтрам "Сірыус", арганізацыю ўдзелу школьнікаў з Расіі ў форуме маладых даследчыкаў "Шлях у навуку".

Прапануецца разгледзець магчымасць пашырэння пераліку прадметаў пры правядзенні алімпіяд школьнікаў Саюзнай дзяржавы.

У плане замацаваны ўдзел прадстаўнікоў сістэмы адукацыі Саюзнай дзяржавы ў Форуме рэгіёнаў Расіі і Беларусі; правядзенне сумеснага пасяджэння калегій Міністэрства навукі і вышэйшай адукацыі РФ, Міністэрства асветы РФ, Міністэрства адукацыі Беларусі, Дзяржаўнага камітэта па навуцы і тэхналогіях Беларусі; удзел у канферэнцыях і форумах у сферы адукацыі, што праводзяцца ў дзвюх краінах.

Будуць праводзіцца мерапрыемствы ў рамках дзейнасці Асацыяцыі школ Беларусі і Расіі. Бакі маюць намер абменьвацца эфектыўным педагагічным вопытам паміж педработнікамі ўстаноў дашкольнай адукацыі.

У плане распрацоўка і арганізацыя дзейнасці беларуска-расійскага рэсурснага цэнтра па навукова-метадычным суправаджэнні педагагічных класаў; распрацоўка сумесных вучэбна-метадычных матэрыялаў па гісторыі, у тым ліку ў форме мультымедыйных прадуктаў і ўдзел прадстаўнікоў сістэмы дашкольнай адукацыі Беларусі ў рабоце VIII Усерасійскага з'езда работнікаў дашкольнай адукацыі; распрацоўка сумеснай праграмы Саюзнай дзяржавы ў галіне давузаўскай адукацыі з далейшай рэалізацыяй.

Будуць праведзены такія мерапрыемствы Саюзнай дзяржавы, як турысцкі злёт навучэнцаў, злёт юных эколагаў "Экалогія без межаў", конкурс навукова-тэхнічнай творчасці навучэнцаў "Таленты XXI стагоддзя", грамадзянска-патрыятычная кадэцкая змена навучэнцаў "За гонар Айчыны". Арганізуюць фестываль ваенна-патрыятычных лагераў і клубаў "Нам ёсць чым ганарыцца, нам ёсць што абараняць".

Важнейшым напрамкам стане рэалізацыя беларуска-расійскага патрыятычнага, культурна-асветнага праекта "Поезд Памяці".

Да ліку значных адукацыйных праектаў Саюзнай дзяржавы адносіцца алімпіяда школьнікаў "Расія і Беларусь: гістарычная і духоўная агульнасць" па рускай мове і рускай літаратуры, што праводзіцца з 2004 года.

Як адзначыў намеснік міністра адукацыі Беларусі Аляксандр Кадлубай, падпісаны план узаемадзеяння ўключае абсалютна ўвесь спектр сферы адукацыі. Візіт расійскай дэлегацыі ва ўстановы адукацыі Беларусі - практыка не новая. Прадстаўнікі Беларусі таксама перыядычна наведваюць установы Расіі, дзеляцца перадавым вопытам, рэалізуюцца сумесныя мерапрыемствы і праграмы.

"Тым не менш кожны раз вызначаем новыя рубяжы ў інтэграцыйных працэсах, у тым ліку па ўніфікацыі адукацыйнай сістэмы", - адзначыў ён, дадаўшы, што такія сустрэчы важны для выбудоўвання адзінай адукацыйнай прасторы ў Саюзнай дзяржаве.

Сумесны план мерапрыемстваў на 2023-2024 гады падпісаны ў ходзе візіту дэлегацыі Міністэрства асветы Расіі ў Беларусь.

версія для друку

зрабіць стартавай

дабавіць у выбранае