Падзеі, факты, анонсы

20 мая, Мінск /Кар. БЕЛТА/. У Беларусі зацверджана палажэнне аб парадку наведвання замежнымі грамадзянамі Нацыянальнага парку "Белавежская пушча". Адпаведная пастанова Савета Міністраў ад 15 мая 2015 года нумар 414 "Аб некаторых пытаннях наведвання замежнымі грамадзянамі Нацыянальнага парку "Белавежская пушча" апублікавана сёння на Нацыянальным прававым інтэрнэт-партале, перадае карэспандэнт БЕЛТА.

Палажэннем вызначаецца парадак наведвання ў турыстычных мэтах на тэрмін да трох сутак замежнымі грамадзянамі парку "Белавежская пушча". Так, іншаземцы могуць знаходзіцца на тэрыторыі парку на падставе сапраўднага пашпарта або іншага дакумента, які яго замяняе, прызначанага для выезду за мяжу і выдадзенага адпаведным органам дзяржавы грамадзянскай прыналежнасці або звычайнага месца жыхарства замежнага грамадзяніна або міжнароднай арганізацыяй; дакумента, што прадастаўляе іншаземцу права на наведванне нацыянальнага парку. Форма апошняга размешчана на сайце дзяржаўнай прыродаахоўнай установы "Нацыянальны парк "Белавежская пушча". Акрамя таго, вызначана, што рабіць у выпадку страты дазвольнага дакумента.

Перамяшчэнне замежных грамадзян па тэрыторыі парку магчыма па ўстаноўленых адміністрацыяй турыстычных маршрутах (веласіпедных, пешаходных і іншых).

Таксама пастановай зацверджана форма дакументаў, якія прадастаўляюць замежным грамадзянам права на індывідуальнае і групавое наведванні Нацыянальнага парку "Белавежская пушча" праз пункт пропуску "Перароў" ("Белавежа").