24 красавіка, Мінск /Кар. БЕЛТА/. Мінскі форум вулічных тэатраў набліжаецца да еўрапейскага ўзроўню. Такое меркаванне выказала сёння на прэс-канферэнцыі ў Мінску дырэктар Цэнтра сучасных мастацтваў Наталля Шаранговіч, перадае карэспандэнт БЕЛТА.
"У гэтым годзе да форуму далучыліся артысты цырка. І гэта асабліва прыемна, таму што наша мерапрыемства такім чынам ператвараецца ў еўрапейскае свята. Паколькі сапраўдны форум вулічных тэатраў заўсёды праходзіць з удзелам артыстаў цырка", - растлумачыла Наталля Шаранговіч.
У беларускай сталіцы з 1 па 3 мая пройдзе трэці такі форум, у якім прымуць удзел больш як 200 артыстаў з Беларусі, Расіі, Украіны, Прыднястроўя, Польшчы, Францыі.
Вопыт паказаў, што такое мерапрыемства выклікае высокую цікавасць гледачоў, сказала Наталля Шаранговіч. У гэтым годзе ў выхадныя на вуліцах старога Мінска гледачы ўбачаць больш як дваццаць выступленняў і карнавальнае шэсце, якое стала ўжо традыцыйным у гэты час года.
Форум адкрые спектакль Нацыянальнага акадэмічнага драматычнага тэатра імя М.Горкага "Viva Commedia!", пастаўлены рэжысёрам з Вероны Матэа Сп'яцы па напісанай спецыяльна для беларускіх артыстаў камедыі Рыкарда Піпа. Вечарам 1 мая пастаноўку, якая ўжо амаль паўгода ідзе на сцэне тэатра, пакажуць на плошчы Свабоды. А 3 мая гледачоў сваім выступленнем парадуе Беларускі дзяржаўны цырк.
Наталля Шаранговіч дадала, што на працягу года праводзіліся майстар-класы. І для некаторых калектываў вопыт удзелу ў форуме стане першым.
Гэта ўжо трэці форум вулічных тэатраў, але ўпершыню ён праходзіць пры фінансавай падтрымцы банка. Паводле слоў дырэктара дэпартамента маркетынгу Альфа-Банка (Беларусь) Кацярыны Краўцовай, Альфа-Банк з вялікім задавальненнем прыняў прапанову стаць партнёрам Цэнтра сучасных мастацтваў, які з'яўляецца арганізатарам гэтага маляўнічага мерапрыемства. "Нам хацелася б, каб у Беларусі з'явілася значнае мерапрыемства, якое стала б у адзін рад з іншымі, што падтрымліваюцца Альфа-Банкам у тых краінах, дзе ён прысутнічае. Таму рады ўдзельнічаць у такім самабытным свяце, яркім беларускім мерапрыемстве, якое не толькі парадуе гасцей, але і раскажа свету аб еўрапейскім Мінску, куды імкнуцца турысты, - сказала яна. - Да канца года жыхароў горада Цэнтр сучасных мастацтваў разам з Альфа-Банкам парадуюць і іншымі мерапрыемствамі, у тым ліку выстаўкамі, перфомансамі".
Заснавальнікамі Мінскага форуму вулічных тэатраў выступілі Мінскі гарадскі выканаўчы камітэт, Міністэрства культуры Беларусі, Цэнтр сучасных мастацтваў. Праект рэалізуецца пры падтрымцы Польскага інстытута ў Мінску, пасольства Французскай Рэспублікі ў Рэспубліцы Беларусь, адукацыйнага цэнтра "ПОСТ", Нацыянальнага акадэмічнага драматычнага тэатра імя М.Горкага, Беларускага дзяржаўнага цырка, ДУ "Мінскканцэрт", агенцтва сацыяльнага маркетынгу GrandBS.