Падзеі, факты, анонсы

12 студзеня, Мінск /Кар. БЕЛТА/. Маладзёжнай сталіцай Беларусі выбраны горад Баранавічы. Аб гэтым паведаміў сёння на прэс-канферэнцыі намеснік міністра адукацыі Віктар Якжык, перадае карэспандэнт БЕЛТА.

Паводле слоў намесніка міністра, у час Года моладзі ў конкурсе ўдзельнічалі каля 10 гарадоў краіны. Іх прадстаўнікі павінны былі прайсці сур'ёзны адборачны тур, у якім сярод крытэрыяў былі і добраўпарадкаванасць тэрыторыі горада, і розныя магчымасці правядзення вольнага часу, атрымання якаснай адукацыі, адпачынку і гэтак далей для моладзі. Лепшым ва ўсіх напрамках дзейнасці ў 2015 годзе, а таксама па планах на 2016-ы стаў горад Баранавічы.

Першыя мерапрыемствы, прысвечаныя маладзёжнай сталіцы, пройдуць у Баранавічах у канцы студзеня. На працягу года запланаваны рэспубліканскія мерапрыемствы: акцыі, праекты, сустрэчы, канферэнцыі. У іх прымуць удзел прадстаўнікі студэнцкай і рабочай моладзі ўсёй Беларусі.