Яшчэ зусім нядаўна, у маі 2014-га, Мінск прымаў лепшыя хакейныя зборныя планеты, а ўжо ў пачатку студзеня 2015-га тут зноў час вялікага хакея. У беларускай сталіцы 11-ы раз адкрыўся неафіцыйны чэмпіянат свету сярод аматараў – Калядны турнір на прыз Прэзідэнта Беларусі. У гэтым годзе яго ўдзельнікамі сталі каманды Германіі, Расіі, Славакіі, Фінляндыі, Швейцарыі, Латвіі і – упершыню – Аб'яднаных Арабскіх Эміратаў. Беларусь па традыцыі прадстаўляе каманда кіраўніка дзяржавы. У складах аматарскіх дружын нямала зорак, якія абаранялі свае зборныя на Алімпійскіх гульнях і сусветных пяршынствах, а пасля завяршэння прафесійнай кар'еры ўжо не ўпершыню прыязджаюць у Мінск пазмагацца за прыз Прэзідэнта Беларусі.