Прынц Майкл Кенцкі наведаў з візітам Беларусь

Бізнесмен і інвестар, вядомы дабрачынец і мецэнат, член брытанскай каралеўскай сям’і прынц Майкл Кенцкі наведаў Беларусь з візітам, які аб’яднаў і шчыры інтарэс да магчымага дзелавога супрацоўніцтва, і рознабаковае знаёмства з нашай краінай.

Пачатак шматдзённай праграмы паклала сустрэча з кіраўніком беларускай дзяржавы: у зацікаўленым дыялогу Аляксандр Лукашэнка і прынц Майкл Кенцкі абмеркавалі пытанні беларуска-брытанскіх адносін і новыя шляхі актывізацыі ўзаемавыгадных кантактаў. Звяртаючыся да госця, Прэзідэнт адзначыў:

– Калі ўжо быць абсалютна шчырым, Вялікабрытанія, напэўна, не вельмі цікавілася сітуацыяй у Беларусі і, хутчэй за ўсё, дзейнічала ў фарватары дзеянняў Бруселя. Ваш прыезд, спадзяюся, адкрые новую старонку нашых адносін, і вельмі многія палітыкі і бізнесмены, якія зацікавяцца Беларуссю, атрымаюць гэту характарыстыку з вашых вуснаў... Мы вельмі спадзяёмся, што нашы адносіны з Вялікабрытаніяй будуць развівацца. У нас вялікі інтарэс у гандлі... Я хачу, каб вы ведалі, што мы сумленна і шчыра чакаем ваш бізнес у Беларусі. Па любых пытаннях, якія вас цікавяць.

У насычаны дзелавы графік прынца Майкла Кенцкага ўвайшлі перагаворы з кіраўніком МЗС Беларусі Уладзімірам Макеем, міністрам транспарту і камунікацый Анатолем Сіваком, міністрам эканомікі Уладзімірам Зіноўскім, кіраўніком Нацыянальнага банка Паўлам Калаурам. Бізнесмен – уладальнік уласнай кансалтынгавай кампаніі – наведаў і ўжо стаўшы адным з вядучых брэндаў Беларусі Парк высокіх тэхналогій, рэзідэнтамі  якога з’яўляюцца буйнейшыя кампаніі еўрапейскага і сусветнага ўзроўняў.

Азнаямленне з гісторыяй і культурай, нацыянальнымі багаццямі краіны прадоўжылася ў нефармальнай атмасферы экскурсіямі па славутых беларускіх выдатных мясцінах. Прынц Майкл Кенцкі наведаў мемарыяльны комплекс "Хатынь" – сімвал трагедыі беларускага народа – і адзін з буйнейшых, першы ў свеце музей Вялікай Айчыннай вайны, выдатныя скарбніцы Нацыянальны мастацкі музей і Вялікі тэатр оперы і балета Беларусі.

Падрабязнасці першага ў гісторыі візіту прадстаўніка брытанскай каралеўскай дынастыі ў Беларусь – у галерэі...

Фота: Аксана Манчук