Галоўныя навіны

2 кастрычніка, Мінск /Святлана Саўко - БЕЛТА/. У Мінску пры ўдзеле кіраўніка дзяржавы адбылася цырымонія закладкі капсул з зямлёй з месц пахавання воінаў - беларусаў, якія загінулі ўдалечыні ад Радзімы, у крыпце Храма-помніка ў гонар Усіх святых, перадае карэспандэнт БЕЛТА.

У цырымоніі прынялі ўдзел кіраўнікі праваслаўнай, каталіцкай, мусульманскай і іўдзейскай рэлігійных канфесій, а таксама дыпламатычных прадстаўніцтваў сямі замежных дзяржаў - Германіі, Аўстрыі, Польшчы, Венгрыі, Чэхіі, Славакіі і Італіі, адкуль прыбылі капсулы з зямлёй з месц пахавання воінаў - беларусаў, якія загінулі ўдалечыні ад Радзімы.

Мітрапаліт Мінскі і Заслаўскі Павел у час цырымоніі прачытаў кароткую малітву, акрапіў капсулы і нішы святой вадой. Заклалі капсулы ваеннаслужачыя роты ганаровай варты. Пасля завяршэння цырымоніі Аляксандр Лукашэнка падышоў да цэнтра крыпты, дзе размешчана лампада з жыватворным агнём, запаліў і ўстанавіў памінальную свечку. У гэты час мужчынскі хор Усіхсвяцкага прыхода выканаў песнапенне "Святы Божа". Пасля запальвання свечкі кіраўнік дзяржавы падышоў да сцяны, у якой размяшчаюцца нішы, дзе яму былі дадзены тлумачэнні аб закладзеных капсулах з месц пахавання.