Прамовы і інтэрв’ю

Хрэнін: такую адкрытасць, якую мы забяспечваем на вучэнні "Захад-2025", цяжка сабе ўявіць

15 верасня, Мінск /Кар. БЕЛТА/. Такую адкрытасць, якую арганізатары забяспечваюць на вучэнні "Захад-2025", цяжка сабе ўявіць. Аб гэтым заявіў міністр абароны Віктар Хрэнін, паведамляе БЕЛТА са спасылкай на Міністэрства абароны.

"Такую адкрытасць, якую мы праяўляем і забяспечваем на вучэнні ("Захад-2025". - Заўвага БЕЛТА), цяжка сабе ўявіць. Галоўная прычына - нам няма чаго хаваць. Таксама мы зацікаўлены ў зніжэнні напружанасці ва Усходне-Еўрапейскім рэгіёне і для гэтага робім рэальныя практычныя крокі. І самы галоўны крок - прынятае нашым Прэзідэнтам рашэнне аб адводзе асноўных дзеянняў войскаў углыб краіны", - сказаў Віктар Хрэнін.

Не менш значным крокам стала і прынятае рашэнне аб зніжэнні параметраў гэтых вучэнняў. "Колькасць задзейнічаных войскаў складае каля 7 тыс. чалавек: 6 тыс. ваеннаслужачых Рэспублікі Беларусь і каля 1 тыс. ваеннаслужачых Расійскай Федэрацыі. У адпаведнасці з Венскім дакументам, вучэнні з такімі параметрамі не падлягаюць паведамленню і не патрабуюць запрашэння наглядальнікаў. Тут мы зрабілі яшчэ адзін практычны крок для зніжэння напружанасці - запрасілі ўсіх прадстаўнікоў дзяржаў - удзельніц Венскага дакумента. Павінна было прысутнічаць больш за 100 чалавек. Як мы бачым, ад АБСЕ за гэтым вучэннем назіраў адзін прадстаўнік", - адзначыў міністр.

Кіраўнік ваеннага ведамства нагадаў, што рашэнне аб правядзенні такіх вучэнняў было прынята ў 2009 годзе кіраўнікамі Беларусі і Расіі. "З гэтага моманту кожныя два гады мы праводзім вучэнне або на тэрыторыі Рэспублікі Беларусь, або на тэрыторыі Расійскай Федэрацыі. Дарэчы, на нашай тэрыторыі гэта пятае ўжо вучэнне. Кожнае вучэнне, падрыхтоўка, асабліва правядзенне мерапрыемстваў, падвяргаюцца мэтанакіраванай інфармацыйнай атацы. Чаго мы толькі ні наслухаліся ад палітыкаў, экспертаў рознага ўзроўню: што мы пагражаем НАТА, што мы цяпер будзем захопліваць краіны Прыбалтыкі. Мы спакойна глядзім на гэтыя інфармацыйныя атакі, таму што, як я сказаў, нам няма чаго хаваць. Мы рыхтуемся да абароны сваёй краіны", - падкрэсліў Віктар Хрэнін.

Ён таксама ўказаў на тое, што каля 150 прадстаўнікоў СМІ з 15 краін асвятлялі вучэнне 15 верасня. "Акрамя іх, таксама былі наглядальнікі з 23 краін. З іх трое - з краін НАТА, у тым ліку з ЗША. Мне нават удалося з імі паразмаўляць і сказаць: глядзіце, назірайце, рабіце высновы. Дзякуй усім, хто прыбыў. Мы абавязкова прадоўжым традыцыю правядзення такога вучэння, калі яно выклікае такую шалёную цікавасць. Будзем і далей праводзіць, як вызначылі нашы кіраўнікі дзяржаў, - раз у два гады. Вельмі лёгка спрагназаваць, дзе і калі будзе наступнае вучэнне", - рэзюмаваў міністр.

версія для друку

зрабіць стартавай

дабавіць у выбранае