Прамовы і інтэрв’ю
Вальфовіч: вучэнне "Захад-2025" не ўяўляе ніякай пагрозы для нашых заходніх суседзяў i заходніх партнёраў
Фота з архiва
12 верасня, Мінск /Кар. БЕЛТА/. Вучэнне "Захад-2025" - абсалютна планавае мерапрыемства. Важнасць гэтага адзначыў дзяржаўны сакратар Савета бяспекі Аляксандр Вальфовіч у час наведвання воінскіх часцей і падраздзяленняў, якія ўдзельнічаюць у вучэнні "Захад-2025", размешчаных на 227-м агульнавайсковым палігоне Барысаўскі, паведамляе БЕЛТА са спасылкай на Міністэрства абароны.
"Пачынаючы з 2000 года, калі было прынята рашэнне аб стварэнні рэгіянальнай групоўкі войскаў, такія мерапрыемствы аператыўнай і баявой падрыхтоўкі праводзяцца сістэматычна - кожныя два гады, па чарзе на тэрыторыі Рэспублікі Беларусь і на тэрыторыі Расійскай Федэрацыі", - падкрэсліў дзяржсакратар.
Ён адзначыў, што вучэнне мае абарончы характар. "Мэты, якія пастаўлены перад вучэннем, - гэта перш за ўсё адпрацоўка пытанняў, звязаных з забеспячэннем ваеннай бяспекі Саюзнай дзяржавы. Вучэнне не ўяўляе ніякай пагрозы для нашых заходніх суседзяў і заходніх партнёраў. Генеральнымі штабамі Рэспублікі Беларусь і Расійскай Федэрацыі праведзена вялікая падрыхтоўчая работа да вучэння. Праведзены шэраг раздзельных і сумесных штабных трэніровак", - звярнуў увагу Аляксандр Вальфовіч.
"Сёння падышлі да фінішнай часткі - практычных дзеянняў. Войскі, штабы выйшлі на ўчасткі мясцовасці і пачалі адпрацоўку пытанняў, - расказаў ён. - Раёны правядзення вучэння адведзены ўглыб тэрыторыі нашай краіны. І сёння пытанні вучэння адпрацоўваюцца далёка ад дзяржаўных граніц Рэспублікі Беларусь. Ваенным ведамствам праведзена вялікая работа ў адпаведнасці з міжнароднымі патрабаваннямі і нормамі аб давядзенні і празрыстасці гэтых вучэнняў да нашых заходніх партнёраў".
Акрамя таго, быў праведзены своечасовы брыфінг пад кіраўніцтвам начальніка Дэпартамента міжнароднага ваеннага супрацоўніцтва, дзе ўсім зацікаўленым былі даведзены мэты, задачы, месцы правядзення, колькасць войскаў, якія прыцягваюцца на вучэнне. Гэта значыць, выкананы ўсе міжнародныя патрабаванні і нормы.
"На жаль, наша запрашэнне назіраць за ходам правядзення вучэнняў не прынята ні польскім, ні літоўскім, ні латвійскім бакамі. Гэта ім не трэба. Чаму? Таму што сёння кіраўніцтва Польшчы, кіраўніцтва краін Прыбалтыкі выдатна ўсведамляе і ведае, што гэта вучэнне, ды і як усё тое, што робіцца на тэрыторыі Рэспублікі Беларусь, не ўяўляе ім ніякай пагрозы", - растлумачыў дзяржаўны сакратар Савета бяспекі.
"Палітыка, якую праводзіць наша краіна, сведчыць аб тым, што Беларусь заўсёды выступала і выступае за мір, бяспеку, добразычлівыя адносіны адзін да аднаго, узаемапавагу, паважанне інтарэсаў дзяржаў, незалежнасць, тэрытарыяльную цэласнасць", - прадоўжыў ён.
"Тыя мерапрыемствы, якія праходзяць сёння тут на палігоне, нацэлены перш за ўсё не на павелічэнне нейкай ваеннай актыўнасці, а на адпрацоўку пытанняў гатоўнасці да абароны сваіх нацыянальных інтарэсаў, сваёй тэрыторыі, - падкрэсліў Аляксандр Вальфовіч. - Мы робім упор не на павелічэнне колькасці войскаў, не на закладванне грошай у куплю вялікай колькасці ўзбраення і ваеннай тэхнікі, а на якасць падрыхтоўкі нашых ваеннаслужачых. Таму гэтыя мерапрыемствы нацэлены на ўдасканаленне прафесійных навыкаў нашых ваеннаслужачых, пачынаючы ад штабоў, генеральных штабоў і заканчваючы штабамі тактычнага ўзроўню".
"Заслухоўваючы сёння камандзіраў расійскай часткі рэгіянальнай групоўкі войскаў, беларускага складніка, я бачу, што камандзіры з разуменнем ставяцца да тых задач, якія ім пастаўлены, адпрацоўваюць і ўдасканальваюць пытанні ўзаемадзеяння, робяць упор на вывучку сваіх падначаленых, войскаў. Упэўнены, што ўсё пройдзе ў адпаведнасці з планамі і задачамі, якія пастаўлены перад рэгіянальнай групоўкай войскаў", - рэзюмаваў дзяржаўны сакратар Савета бяспекі.
Аляксандр Вальфовіч пагутарыў з беларускімі і расійскімі ваеннаслужачымі, ацаніў дзеянні войскаў пры сумесным адбіцці ўдараў сродкаў паветранага нападзення праціўніка.
Дзяржаўны сакратар Савета бяспекі адзначыў, што штабы і войскі, якія выконваюць пастаўленыя вучэбна-баявыя задачы, паказалі высокі ўзровень падрыхтоўкі і ўзаемадзеяння.
Аляксандр Вальфовіч таксама абазначыў, што вучэнне "Захад-2025" праводзіцца арганізавана і пастаўленыя мэты будуць дасягнуты.
версія для друку
зрабіць стартавай
дабавіць у выбранае