Прамовы і інтэрв’ю

Вальфовіч: вопыт СВА i іншых канфліктаў улічваюць ва Узброеных Сілах Беларусі

15 кастрычніка, Мінск /Кар. БЕЛТА/. Ва Узброеных Сілах Беларусі ўлічваюць вопыт спецыяльнай ваеннай аперацыі і іншых узброеных канфліктаў. Аб гэтым журналістам заявіў дзяржаўны сакратар Савета бяспекі Аляксандр Вальфовіч па выніках даклада кіраўніку дзяржавы аб праверцы воінскіх часцей і падраздзяленняў, перадае карэспандэнт БЕЛТА.

Журналісты пацікавіліся ў Аляксандра Вальфовіча, наколькі вопыт правядзення спецыяльнай ваеннай аперацыі ва Украіне ўлічваецца ў беларускай арміі. Тым больш расійскія саюзнікі гатовы дзяліцца гэтым вопытам. Акрамя таго, у дзяржсакратара Савета бяспекі спыталі, ці адпрацоўваліся падобныя элементы ў час праверкі воінскіх часцей і падраздзяленняў.

"Несумненна, вопыт спецыяльнай ваеннай аперацыі і наогул вядзення баявых дзеянняў у іншых канфліктах па свеце ў нашых Узброеных Сілах улічваецца. Гэтыя змяненні ўнесены ў праграмы баявой падрыхтоўкі. Вядома, упор пры праверцы мы робім якраз на тым, як гэта ўлічваецца, - сказаў Аляксандр Вальфовіч. - Калі планавалі нашу праверку, мы якраз улічвалі формы і спосабы вядзення баявых дзеянняў, якія адпрацоўваюцца сёння ў ходзе спецыяльнай ваеннай аперацыі".

Паводле яго слоў, у час праверкі ўвага акцэнтавалася на зладжанасці дзеянняў падраздзяленняў у складзе малых груп, а таксама штурмавых падраздзяленняў. Увага таксама ўдзялялася ўменню ваеннаслужачых абсталёўваць раёны ў інжынерным плане з улікам вопыту спецыяльнай ваеннай аперацыі. "Гэта прынцып такі: "закапаўся" чым глыбей, замаскіраваўся - значыць, тым больш шанцаў на выжыванне і выкананне задач", - падкрэсліў ён.

Правяралася таксама ўменне процідзейнічаць беспілотным лятальным апаратам і прымяняць сродкі радыёэлектроннай барацьбы. "Вядома ж, гэта ўлічваецца. Трэба вучыць ваеннаслужачых таму, што патрэбна для таго, каб выжыць на полі бою і выканаць пастаўленыя задачы", - дадаў Аляксандр Вальфовіч.

Дзяржсакратар Савета бяспекі адзначыў, што гэтаму садзейнічала і праведзенае нядаўна вучэнне "Захад-2025". "Нашы расійскія калегі ў час гэтых вучэнняў падзяліліся з намі тым практычным вопытам (не на словах, а на справе), які яны атрымліваюць у ходзе спецыяльнай ваеннай аперацыі. Сёння гэта ўлічваецца ў нашых Узброеных Сілах пры падрыхтоўцы нашых ваеннаслужачых", - рэзюмаваў ён.

версія для друку

зрабіць стартавай

дабавіць у выбранае