Прамовы і інтэрв’ю

Вальфовіч: ініцыятывы Прэзідэнта Беларусі знаходзяць водгук на саміце АДКБ

Фота Мінабароны

27 лістапада, Бішкек /Кар. БЕЛТА/. Ініцыятывы Прэзідэнта Беларусі, у тым ліку выказаныя нядаўна на Мінскай міжнароднай канферэнцыі па еўразійскай бяспецы, знаходзяць водгук сярод удзельнікаў саміту АДКБ у Бішкеку. Аб гэтым заявіў журналістам дзяржаўны сакратар Савета бяспекі Беларусі Аляксандр Вальфовіч, перадае карэспандэнт БЕЛТА.

У Бішкеку напярэдадні сустрэчы на ўзроўні кіраўнікоў дзяржаў адбылося сумеснае пасяджэнне дзяржаўных сакратароў саветаў бяспекі, міністраў абароны і кіраўнікоў МЗС краін - партнёраў АДКБ.

"Вельмі шмат было сказана пра нашу міжнародную канферэнцыю, якая зусім нядаўна прайшла ў Мінску і сапраўды набірае абароты з кожным годам. Ініцыятывы нашага Прэзідэнта, якія былі агучаны на гэтай канферэнцыі, знайшлі водгук. Пра гэта таксама гаварылася", - сказаў Аляксандр Вальфовіч.

Кіраўнік дзяржсакратарыята расказаў, што ва ўзгодненыя для саміту АДКБ рашэнні ў тым ліку закладзены практычныя крокі, якія абмяркоўваліся на палях Мінскай канферэнцыі.

"Гэтыя дакументы закладваюць тыя процівагі, якія могуць паўплываць на існуючыя пагрозы і, адпаведна, забяспечыць бяспеку арганізацыі ў цэлым", - адзначыў Аляксандр Вальфовіч.

Паводле яго слоў, у рамках АДКБ разглядаюць і абмяркоўваюць самыя розныя пагрозы, якія ўзнікаюць па перыметры арганізацыі, і як ім процістаяць разам. Напрыклад, на паўднёвым напрамку гэта ў тым ліку процідзеянне наркатрафіку, нелегальнай міграцыі. З іншага боку, што асабліва хвалюе Беларусь і Расію, - гэта мілітарызацыя на заходніх рубяжах і нарошчванне ваеннага кантынгенту ў сумежных краінах Еўропы. Але ўсе гэтыя выклікі і пагрозы так ці інакш уплываюць на бяспеку ўсіх партнёраў па АДКБ.

"Толькі разам, сумесна можна процідзейнічаць усім пагрозам, даваць адпор і рэалізоўваць ініцыятывы", - упэўнены кіраўнік дзяржсакратарыята.

Аляксандр Вальфовіч асабліва падкрэсліў, што калі Захад нарошчвае ваенны патэнцыял, мілітарызуецца, то краіны АДКБ не павялічваюць колькасць сваіх узброеных сіл, а робяць упор на якасць і аснашчэнне новымі, найбольш сучасным сродкамі ўзбраення і размяшчэнне іх на сваёй тэрыторыі. "У прыватнасці, размяшчэнне (у Беларусі. - Заўвага БЕЛТА) комплексу "Арэшнік". Гэта абарона ўсёй арганізацыі з Захаду. У процівагу таму, што сёння, на жаль, робіцца на нашых заходніх граніцах побач з нашай арганізацыяй", - сказаў ён.

версія для друку

зрабіць стартавай

дабавіць у выбранае