Прамовы і інтэрв’ю
Вальфовіч: мэты вучэнняў "Захад-2025" выключна абарончыя
27 жніўня, Орша /Кар. БЕЛТА/. Мэты вучэнняў "Захад-2025" выключна абарончыя. Аб гэтым журналістам заявіў дзяржаўны сакратар Савета бяспекі Аляксандр Вальфовіч у час наведвання шэрага прадпрыемстваў Аршанскага раёна, перадае карэспандэнт БЕЛТА.
"Ужо столькі сказана кіраўніком нашай дзяржавы, кіраўніцтвам Міністэрства абароны аб тым, што гэтыя вучэнні ("Захад-2025". - Заўвага БЕЛТА) планавыя, такія вучэнні праходзяць раз у два гады. Мэты вучэнняў зусім не наступальныя. На тэрыторыі нашых суседніх дзяржаў праводзяцца вучэнні выключна з наступальнымі мэтамі. Для нашых вучэнняў пастаўлена выключна абарончая мэта - абарона Саюзнай дзяржавы", - сказаў Аляксандр Вальфовіч.
Ён таксама дадаў, што ў мэтах зняцця напружання, усе раёны правядзення вучэнняў перанесены ўглыб тэрыторыі краіны, хоць першапачаткова планавалася задзейнічаць практычна ўсе палігоны ў Брэсцкай і Гродзенскай абласцях. "А нашы суседзі, у адказ на нашу добразычлівую рыторыку, разгарнулі групоўку войскаў для правядзення вучэнняў на палігонах паблізу нашай граніцы.Так, сёння больш за 1 тыс. чалавек знаходзіцца на палігоне Пабрадэ, за 15 км ад нашай граніцы. Як нам на гэта рэагаваць? Перадыслацыравана дадатковая часць авіяцыі на аэрадромы Польшчы і краін Прыбалтыкі, дзе знаходзіцца больш за 148 самалётаў. Праводзяцца і іншыя мерапрыемствы, якія нас павінны насцярожыць і, напэўна, падштурхнуць на меры ў адказ, справакаваць хочуць. Але мы разумныя людзі, мы нікога правакаваць не будзем, сочым і гатовы даць істотны адпор нядобразычліўцам, калі яны раптоўна асмеляцца зрабіць замах на нашу тэрыторыю. Сваю зямлю мы нікому не аддадзім, мы яе будзем абараняць да апошняга дыхання, як абаранялі яе нашы продкі", - падкрэсліў дзяржаўны сакратар.
Ён таксама звярнуў увагу на планавы характар і вучэнняў АДКБ, якія ў тым ліку пройдуць і на тэрыторыі Рэспублікі Беларусь. "Практычна ўсе кантынгенты краін АДКБ прыбылі на палігон Лосвіда, які таксама знаходзіцца ў глыбіні нашай краіны. Гэта таксама планавыя вучэнні, якія праходзяць па чарзе на тэрыторыі краін АДКБ. Самыя вялікія вучэнні на тэрыторыі Беларусі - "Узаемадзеянне-2025". На іх будуць задзейнічаны Калектыўныя сілы аператыўнага рэагавання (КСАР). Чакаецца адпрацоўка пытанняў, звязаных з лакалізацыяй канфлікту на тэрыторыі адной з дзяржаў", - адзначыў Аляксандр Вальфовіч. Ён таксама дадаў, што на тэрыторыі Беларусі будуць праведзены спецыяльнае вучэнне з сіламі і сродкамі разведкі "Пошук-2025", а таксама з сіламі і сродкамі матэрыяльна-тэхнічнага забеспячэння КСАР "Эшалон-2025".
Гэтыя дзеянні накіраваны на забеспячэнне правапарадку і бяспекі на тэрыторыі краін, якія ўваходзяць у АДКБ. "Яны праводзяцца не па плану Рэспублікі Беларусь, а па плану Сакратарыята АДКБ. Ніякай пагрозы яны таксама нікому не нясуць. Будуць удасканальвацца формы, спосабы вядзення баявых дзеянняў па лакалізацыі канфлікту. Заадно падзелімся сваім вопытам, паглядзім на абучанасць і падрыхтоўку нашых сяброў", - рэзюмаваў дзяржаўны сакратар.
версія для друку
зрабіць стартавай
дабавіць у выбранае