Прамовы і інтэрв’ю

Сівец: памяць аб гераізме пакалення пераможцаў - залог мірнага, паспяховага i шчаслівага жыцця

6 мая, Мінск /Кар. БЕЛТА/. Памяць аб гераізме пакалення пераможцаў застаецца залогам мірнага, паспяховага і шчаслівага жыцця, адзначыў у каментарыі журналістам старшыня Канстытуцыйнага Суда Сяргей Сівец пасля ўскладання кветак да стэлы "Мінск - горад-герой", перадае карэспандэнт БЕЛТА.

Старшыня Канстытуцыйнага Суда, суддзі і работнікі Сакратарыята ўсклалі кветкі ў знак памяці загінулых абаронцаў Айчыны, выказаўшы глыбокую павагу да подзвігу беларускага народа.

"Сёння ў гэтым знакавым і свяшчэнным месцы суддзі і работнікі Сакратарыята Канстытуцыйнага Суда сабраліся, каб аддаць даніну памяці, павагі, бязмернай удзячнасці ветэранам, усяму пакаленню пераможцаў, дзякуючы стальной волі і бязмежнай любові да Радзімы якіх удалося пераадолець сцяну агню і свінцу ў ліхія гады ваеннага летапісу нашай краіны", - сказаў Сяргей Сівец.

Подзвіг продкаў у гады Вялікай Айчыннай вайны, паводле яго слоў, даў магчымасць усім наступным пакаленням жыць пад мірным небам на сваёй зямлі, у свабоднай і незалежнай краіне.

"Сёння наш агульны абавязак - быць дастойным спадчыны пераможцаў, цвёрда трымаць у сваіх руках Сцяг Вялікай Перамогі, актыўна процідзейнічаць агрэсіўным спробам фальсіфікацыі і перапісвання гісторыі, прыніжэння ролі і ўкладу савецкага народа ў перамогу над фашызмам. А яшчэ наш абавязак - перадаць памяць і праўду аб той вайне нашым дзецям і ўнукам. Бо памяць, яна не падуладная  законам часу. Яна была, ёсць і будзе той асновай, тым фундаментам, які з'яўляецца залогам нашага мірнага, паспяховага і шчаслівага жыцця", - падкрэсліў Сяргей Сівец.

Гаворачы аб палажэннях Канстытуцыі, якія датычацца забеспячэння дзяржавай захавання гістарычнай праўды і памяці аб гераічным подзвігу беларускага народа ў гады Вялікай Айчыннай вайны, старшыня Канстытуцыйнага Суда звярнуў увагу, што Асноўны Закон - гэта грамадскі дагавор, у якім закладзены асноўныя каштоўнасці, дзякуючы якім фарміруецца, развіваецца, жыве грамадства. Таксама ён з'яўляецца асновай, якая павінна рэалізоўвацца ў практычных справах.

"Пачынаючы з самага малодшага ўзросту, са школьнікаў, у кожным дзеянні, у кожнай падзеі, у школьных падручніках, у гістарычнай літаратуры, мы павінны паказаць подзвіг савецкага народа ў Вялікай Айчыннай вайне і тое, што зрабіў савецкі народ для ўсяго прагрэсіўнага чалавецтва, перамогшы карычневую чуму, фашызм, даўшы магчымасць свету існаваць, развівацца, жыць пад мірным небам і гадаваць дзяцей", - сказаў Сяргей Сівец. Ён дадаў, што толькі так можна быць упэўненым, што настане заўтра - такое ж бяспечнае, мірнае і шчаслівае.