Прамовы і інтэрв’ю
Сацыёлаг: больш за 95 працэнтаў беларусаў адзначаюць, што жывуць у бяспечнай i спакойнай краіне
Фота з архiва
30 кастрычніка, Мінск /Кар. БЕЛТА/. Больш за 95 працэнтаў беларусаў адзначаюць, што яны жывуць у бяспечнай і спакойнай краіне. Аб гэтым расказаў журналістам намеснік дырэктара па навуковай рабоце Інстытута сацыялогіі Нацыянальнай акадэміі навук Беларусі Аляксандр Пасталоўскі перад пятай Міжнароднай навукова-практычнай канферэнцыяй "Сацыяльныя веды ў сучасным грамадстве: праблемы, заканамернасці, перспектывы", перадае карэспандэнт БЕЛТА.
Інстытут сацыялогіі НАН Беларусі займаецца фундаментальнымі і прыкладнымі даследаваннямі беларускага грамадства. "Тое, што актуальна, што хвалюе наша насельніцтва, - непасрэдна прадмет нашых сацыялагічных даследаванняў. Гэта і гістарычная памяць беларускага грамадства, асаблівасці медыяспажывання, стаўленне да сістэмы аховы здароўя, адукацыі. Усе гэтыя актуальныя трэнды, тэматыкі, яны запатрабаваны непасрэдна і знаходзяцца ў інфармацыйным парадку дня. Ёсць асобны напрамак - заданне органаў дзяржаўнага кіравання, у прыватнасці, праект па даверы да СМІ. Гэта сумесны даследчы праект з Міністэрствам інфармацыі Беларусі", - расказаў Аляксандр Пасталоўскі.
Паводле слоў сацыёлага, самым значным дасягненнем больш як 30-гадовага станаўлення інстытута прэзідэнцтва з'яўляецца адчуванне бяспекі насельніцтва. "Больш за 95 працэнтаў беларусаў адзначаюць, што яны жывуць у бяспечнай і спакойнай краіне. Зноў жа, фактар стабільнасці соцыуму з'яўляецца асноватворным канцэптам нашай дзяржаўнасці. Неабходна таксама адзначыць, што людзі ўдзяляюць больш увагі гістарычнай памяці, значнасці гісторыі. Чалавек, які любіць гісторыю, на думку большасці рэспандэнтаў, з'яўляецца патрыётам сваёй краіны", - расказаў ён.
Безумоўна, Інстытут сацыялогіі ідзе ў нагу з часам і прымяняе штучны інтэлект у сваіх даследаваннях, дадаў Аляксандр Пасталоўскі. "Тыя спрыяльныя ўмовы, якія ствараюцца кіраўніком нашай дзяржавы, урадам для развіцця навуковых даследаванняў, садзейнічаюць умацаванню навукова-тэхнічнай бяспекі краіны і дазваляюць рэалізоўваць асноўныя тэндэнцыі навукова-тэхнічнага прагрэсу. Сацыёлагі працуюць з масівамі эмпірычных даных. Іх трэба аналізаваць па палавой прыкмеце, узросце, розных квотах, але не трэба забываць, што штучны інтэлект не павінен замяняць чалавечы", - упэўнены ён.
Ён адзначыў, што ў навуковай канферэнцыі прымаюць удзел сацыёлагі з Расіі, Казахстана. "Будуць абмяркоўвацца актуальныя трэнды, вынікі сацыялагічных даследаванняў, агульныя аспекты бяспекі Саюзнай дзяржавы, пытанні прымянення штучнага інтэлекту ў розных даследаваннях. Гэта дыялогавая пляцоўка для абмену канструктыўнымі думкамі аб перадавых тэхналогіях у галіне сацыялагічных навук. Такі дыялог неабходны. Нам трэба кааперавацца і разам працаваць", - адзначыў сацыёлаг.
Загадчык сектара тэорыі палітыкі Інстытута сусветнай эканомікі і міжнародных адносін РАН Эдуард Салаўёў падкрэсліў, што з беларускім бокам ідзе актыўнае супрацоўніцтва па самых розных трэках у рамках Саюзнай дзяржавы. "Развіваюцца грантавыя праграмы. Гэта пятая канферэнцыя ўжо. І ў папярэднія гады тут заўсёды было цікава. Гэта карысная пляцоўка для навучання", - падзяліўся ён меркаваннем.
Эдуард Салаўёў збіраецца прадставіць на канферэнцыі даклад, прысвечаны праблематыцы трансфармацыі партыйна-палітычных сістэм у сучасных краінах Захаду. "Буду гаварыць аб тых даволі цікавых працэсах, якія там адбываюцца", - расказаў вучоны.
Вядучы навуковы супрацоўнік Інстытута манголазнаўства, будалогіі і тыбеталогіі СА РАН Павел Дудзін раскажа на канферэнцыі аб магчымасцях, якія адкрывае штучны інтэлект для сацыягуманітарных даследаванняў, і прадэманструе шэраг кейсаў, якія паказалі ўжо сваю эфектыўнасць. "Працуем са старадаўнімі рукапісамі. Частка прадстаўлена тут на выстаўцы. Таксама са старадаўнімі картамі, усходнімі мовамі. Напрыклад, старажытнакітайскі класічны вэньянь быў даступны да нядаўняга часу толькі экспертам. Штучны інтэлект дазволіў літаральна за лічаныя гадзіны дабрацца да вельмі важных і ўнікальных экспанатаў", - упэўнены ён.
Павел Дудзін расказаў, што Беларусь ён наведвае ўпершыню. "Адчуванні, нібыта дома. Спадзяюся, гэта не апошні візіт сюды. Калісьці я дыстанцыйна шукаў матэрыял для даследаванняў менавіта ў Нацыянальнай бібліятэцы Беларусі", - сказаў на заканчэнне вучоны.
версія для друку
зрабіць стартавай
дабавіць у выбранае