Прамовы і інтэрв’ю
Рыжанкоў пра візіт Сіярта ў Мінск: у Еўропе ёсць сілы, якія аб'ектыўна ацэньваюць абстаноўку
10 верасня, Мінск /Кар. БЕЛТА/. Візіт у Мінск міністра замежных спраў і знешняга гандлю Венгрыі Петэра Сіярта дэманструе, што ў Еўропе ёсць сілы і лідары, якія аб'ектыўна ацэньваюць абстаноўку. Аб гэтым заявіў журналістам міністр замежных спраў Беларусі Максім Рыжанкоў, перадае карэспандэнт БЕЛТА. "
Візіт міністра замежных спраў і знешняга гандлю Венгрыі ў Беларусь яшчэ раз дэманструе, што ў Еўропе ёсць сілы і, галоўнае, лідары, якія аб'ектыўна ацэньваюць абстаноўку і разумеюць, што, знаходзячыся на высокай дзяржаўнай пасадзе, трэба дзейнічаць у інтарэсах выключна сваёй дзяржавы і свайго народа. Шляхам канфрантацыі, націску, эскалацыі нельга прыйсці да нечага добрага", - падкрэсліў кіраўнік МЗС Беларусі.
Міністр запэўніў, што Беларусь заўсёды была і застаецца нацэлена на дыялог і ўзаемную павагу да партнёраў. "Мы бачым, што нашы венгерскія сябры гэта цэняць. Мы таксама вельмі цэнім адносіны венгерскіх сяброў да сённяшняй сітуацыі ў Беларусі", - сказаў Максім Рыжанкоў, дадаўшы, што так будзе прадаўжацца і ў далейшым.
Пры гэтым, падкрэсліў кіраўнік МЗС, Беларусь ужо два гады трымае вельмі добры тэмп у двухбаковым парадку дня з Венгрыяй. Гэта датычыцца як кантактаў на палітычным узроўні, так і гандлёва-эканамічнага ўзаемадзеяння.
"Мы адкрыта, шчыра, сумленна вядзём камунікацыю па многіх напрамках, таму што нас аб'ядноўваюць агульныя мэты і намеры - рабіць усё магчымае на карысць сваіх народаў і без урону іншым. Беларусь і Венгрыя ажыццяўляюць незалежную знешнюю палітыку, грунтуючыся на нацыянальных інтарэсах і ўзаемнай павазе", - заявіў Максім Рыжанкоў.
Паводле яго слоў, Беларусь імкнецца развіваць супрацоўніцтва як з усімі краінамі на Усходзе, так і з сябрамі на Захадзе. "Таксама хацеў бы адзначыць, што Беларусь мае стратэгічныя сувязі з Расіяй, Кітаем, валодае доступам да велізарнага рынку ЕАЭС, нядаўна стала паўнапраўным членам ШАС і партнёрам БРІКС. Мы гатовы ў гэтых арганізацыях таксама пашыраць інтарэсы нашых сяброў з Венгрыі", - запэўніў Максім Рыжанкоў.
Кіраўнік МЗС выказаў надзею, што той курс не на разбурэнне, а на стварэнне і будаўніцтва мастоў, які сёння праводзіць Венгрыя, з цягам часу будзе ўспрыняты і іншымі еўрапейскімі дзяржавамі.
"У беларуска-венгерскім узаемадзеянні мы аддаём перавагу канструктыўнаму дыялогу і паступальнай планамернай рабоце на карысць людзей, яшчэ раз падкрэслю гэта. Менавіта з гэтай мэтай сёння праведзена чарговае пасяджэнне нашай міжурадавай камісіі па эканамічным супрацоўніцтве і бізнес-форум. Па выніках гэтых мерапрыемстваў будзе дасягнуты шэраг дамоўленасцей па ўзмацненні супрацоўніцтва паміж нашымі краінамі ў канкрэтных сферах", - падкрэсліў Маскім Рыжанкоў.
Кіраўнік МЗС звярнуў увагу, што гэтым вынікам папярэднічала сур'ёзная работа з абодвух бакоў. Паміж экспертамі вызначаны крокі па ўзаемадзеянні на бліжэйшую перспектыву. Гэта закранае такія сферы, як энергетыка, сельская гаспадарка, прамысловасць, ахова здароўя, фармацэўтыка, спорт і турызм. "У нас ёсць планы па напаўненні гэтых сфер яшчэ большым практычным зместам. Мы вымушаны лічыцца з дзеючымі ў адносінах да Беларусі санкцыямі, аднак сённяшні бізнес-форум, у якім шырока ўдзельнічаюць прадстаўнікі венгерскага боку, паказвае, што гэтыя не абгрунтаваныя нічым абмежаванні абсалютна не падтрымліваюцца ні бізнесам, ні людзьмі. Нават у гэтых умовах мы знаходзім магчымасці для развіцця нашых адносін і рэалізацыі двухбаковых праектаў", - сказаў Максім Рыжанкоў.
Кіраўнік МЗС канстатаваў, што Беларусь і Венгрыя застаюцца адзінымі еўрапейскімі краінамі, якія на справе прыхільныя палітыцы свабоднага рынку, роўных умоў і прынцыпаў сапраўды партнёрскіх адносін.
"Адзначу, што і кіраўніцтва Венгрыі, і беларускае кіраўніцтва выбудоўваюць сваю палітыку на аснове інтарэсаў большасці свайго насельніцтва, а не па ўказцы звонку. І мы паважаем нашых венгерскіх партнёраў і сяброў за такую пазіцыю", - рэзюмаваў ён.
версія для друку
зрабіць стартавай
дабавіць у выбранае