Прамовы і інтэрв’ю

Рыжанкоў: Беларусь вітае дыялог, які пачаўся паміж Расіяй i ЗША

Фота ТАСС

26 лютага, Мінск /Кар. БЕЛТА/. Беларусь вітае дыялог, які пачаўся паміж Расіяй і ЗША, па ўрэгуляванні канфлікту ва Украіне. Аб гэтым міністр замежных спраў Беларусі Максім Рыжанкоў заявіў 26 лютага ў Жэневе ў час удзелу ў сегменце высокага ўзроўню Канферэнцыі ААН па раззбраенні, перадае карэспандэнт БЕЛТА.

"Беларусь неаднаразова вылучала ініцыятывы, накіраваныя на зніжэнне ваенна-палітычнай напружанасці, аднаўленне даверу, у тым ліку ва Украіне. У сувязі з гэтым мы вітаем дыялог, які пачаўся паміж Расіяй і ЗША, па ўрэгуляванні канфлікту. Шчыра разлічваем на палітычную волю і мудрасць дыпламатыі па вяртанні міру ў наш рэгіён", - сказаў міністр.

"Мы ўсе ведаем, што па законе жанру, калі на сцяне вісіць ружжо, яно абавязкова выстраліць. Таму нам усім трэба перастаць глядзець адзін на аднаго праз прыцэл гармат і размаўляць у фармаце палітычных ультыматумаў і безразважных эканамічных санкцый", - заклікаў Максім Рыжанкоў.

Паводле яго слоў, кіруючыся гэтым падыходам, Беларусь у 2023 годзе правяла міжнародную канферэнцыю па еўразійскай бяспецы, якая пацвердзіла запыт на справядлівую, бяспечную і ўстойлівую архітэктуру міжнародных адносін.

"Мы ўбачылі зацікаўленасць у развіцці дыялогу па аб'яднальным парадку дня, пошуку новых фарматаў узаемадзеяння. Ва ўсіх абсалютна краінах, у тым ліку краінах Захаду, - заявіў дыпламат. - Я маю на ўвазе экспертаў, аналітыкаў, прадстаўнікоў навуковых колаў".

Па просьбе міжнародных экспертаў і шэрага дзяржаў Беларусь вырашыла прадаўжаць выкарыстоўваць фармат мінскай канферэнцыі ў якасці пляцоўкі для дыялогу. Таму гэтай восенню Беларусь правядзе ІІІ Мінскую канферэнцыю па еўразійскай бяспецы. "Мы запрашаем усіх зацікаўленых на адкрыты дыялог", - дадаў кіраўнік МЗС.

версія для друку

зрабіць стартавай

дабавіць у выбранае