Прамовы і інтэрв’ю

19 мая, Мінск /Кар. БЕЛТА/. Намеснік міністра замежных спраў Валянцін Рыбакоў 18 мая на тэматычным мерапрыемстве ў ААН выступіў за актывізацыю міжнародных механізмаў барацьбы з гандлем людзьмі. Аб гэтым БЕЛТА паведамілі ў прэс-службе беларускага МЗС.

Пасяджэнне, у якім Валянцін Рыбакоў прыняў удзел у якасці ганаровага госця, прысвячалася барацьбе з насіллем у адносінах да дзяцей, эксплуатацыяй і гандлем дзецьмі. Мерапрыемства было арганізавана дэлегацыямі Інданезіі, Мексікі, Танзаніі, Швецыі і Японіі. "Беларускі дыпламат адзначыў неабходнасць актывізацыі сумесных антытрафікінгавых намаганняў і існуючых міжнародных механізмаў у ААН па барацьбе з гандлем людзьмі. Валянцін Рыбакоў таксама выступіў за неабходнасць комплекснага падыходу ў гэтай рабоце для забеспячэння паспяховага дасягнення мэт устойлівага развіцця па барацьбе з гандлем людзьмі і сучасным рабствам", - праінфармавалі ў МЗС.

Валянцін Рыбакоў прыцягнуў увагу ўдзельнікаў мерапрыемства да правядзення ў 2017 годзе пасяджэння Генеральнай Асамблеі ААН высокага ўзроўню па аглядзе глабальнага плана дзеянняў па барацьбе з гандлем людзьмі. Намеснік міністра заклікаў да актыўнага ўдзелу ўсіх зацікаўленых у падрыхтоўцы гэтага важнага мерапрыемства Генасамблеі ААН.

У 2010 годзе па ініцыятыве Беларусі была арганізавана Група сяброў, якія аб'ядналіся ў барацьбе з гандлем людзьмі. Цяпер у склад групы ўваходзяць 24 дзяржавы, што прадстаўляюць усе рэгіёны свету. Па ініцыятыве Групы сяброў ГА ААН прыняла глабальны план дзеянняў па барацьбе з гандлем людзьмі.