Афіцыйны сайт Рэспублікі Беларусь
Навіны
Каляндар падзей у Беларусі
Выдатныя мясціны Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Навіны | Прамовы і інтэрв’ю

Прамовы і інтэрв’ю

7 Sep 2018

Румас разлічвае на вырашэнне цяжкасцей з уваходам беларускіх прадпрыемстваў на рынак Кітая

Румас разлічвае на вырашэнне цяжкасцей з уваходам беларускіх прадпрыемстваў на рынак Кітая

7 верасня, Мінск /Кар. БЕЛТА/. Прэм'ер-міністр Сяргей Румас лічыць важным вырашыць цяжкасці з уваходам беларускіх прадпрыемстваў на рынак Кітая. Аб гэтым кіраўнік беларускага ўрада заявіў сёння на сустрэчы з паслом Кітая ў Беларусі Цуй Цымінам, перадае карэспандэнт БЕЛТА.

"Узровень стратэгічнага ўзаемадзеяння паміж нашымі краінамі вельмі высокі, паміж кіраўнікамі нашых дзяржаў склаліся цудоўныя асабістыя адносіны. Але я вымушаны са шкадаваннем канстатаваць, што ўзровень гандлёва-эканамічных адносін не дацягвае да ўзроўню палітычных", - сказаў Сяргей Румас.

Хоць апошнім часам беларускі экспарт у Кітай стаў расці больш хуткімі тэмпамі, але разрыў паміж экспартам і імпартам не скарачаецца. "Нашы прадпрыемствы, на жаль, адчуваюць цяжкасці з уваходжаннем на кітайскі рынак, - адзначыў прэм'ер-міністр. - Мы ўдзячныя кітайскаму боку за тое, што ён знімае каранцінныя абмежаванні для беларускай сельгаспрадукцыі. Але таксама вымушаны канстатаваць, што беларускія грамадзяне і кампаніі сутыкаюцца з фінансавымі бар'ерамі пры разліках".

Паводле слоў Сяргея Румаса, шэраг дамоўленасцей, дасягнутых на сустрэчы лідараў дзвюх дзяржаў у ходзе чэрвеньскага саміту ШАС у Цындаа, ужо рэалізуюцца, у першую чаргу гэта датычыцца спрашчэння візавага рэжыму. Па іншых дамоўленасцях яшчэ наперадзе вялікая работа - напрыклад, у Кітайска-беларускім індустрыяльным парку "Вялікі камень" плануецца правесці глабальны эканамічны форум.

Беларусь у лістападзе прыме ўдзел у першай кітайскай міжнароднай выстаўцы "Імпарт Экспа", якая адбудзецца ў Шанхаі. Гэта мерапрыемства будзе добрай пляцоўкай для пашырэння на кітайскім рынку не толькі беларускіх тавараў, але і паслуг, лічыць прэм'ер-міністр.

Гэты год аб'яўлены Годам турызму Беларусі ў Кітаі, ёсць дамоўленасць правесці ў 2019-м Год адукацыі Беларусі і Кітая.

"У нас вельмі шмат вымярэнняў, дзе трэба развівацца ў супрацоўніцтве. Спадзяюся на вашу актыўную пазіцыю як пасла і падтрымку ў гэтым пытанні", - рэзюмаваў Сяргей Румас.

Цуй Цымін адзначыў, што поўнасцю згодны з ацэнкай, якую беларускі прэм'ер-міністр даў стану беларуска-кітайскіх адносін. "У апошнія гады двухбаковыя адносіны перажываюць найлепшы перыяд у сваёй гісторыі. Нашы ўзаемасувязі і кантакты на вышэйшым і высокім узроўні пачасціліся, таксама ўмацаваўся наш палітычны ўзаемадавер", - лічыць пасол.

Архіў
Пн Аўт Сер Чцв Пт Сб Нядз
Помнікі Вялікай Айчыннай вайны ў Беларусі