29 мая, Мінск /Кар. БЕЛТА/. Інтарэс да Беларусі з боку дзяржаў Еўропы расце. Гэта адзначыў 27 мая на сустрэчы з прадстаўнікамі рэспубліканскага грамадскага аб'яднання "Белая Русь" старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Рахманаў, перадае карэспандэнт БЕЛТА.
На міжнароднай арэне назіраюцца працэсы дэінтэграцыі, што з'яўляецца рэакцыяй на негатыўныя праявы глабалізацыі, адзначыў Сяргей Рахманаў. Глабалізацыя, з аднаго боку, натуральны працэс, накіраваны на развіццё магчымасцей, з іншага - на ўмацаванне палітыкі вядучых дзяржаў у іх інтарэсах. Еўрапейская інтэграцыя вядзе да таго, што многія краіны практычна поўнасцю страчваюць эканамічны суверэнітэт, галоўным чынам там развіваецца сфера абслугоўвання.
Тэндэнцыі дэглабалізацыі прадаўжаюцца, і краіны будуць шукаць шляхі альтэрнатыў, лічыць Сяргей Рахманаў. Значным сведчанне таго з'яўляецца велізарны інтарэс да Беларусі з боку краін Еўропы.
Як паведамлялася, 30 мая ў Мінску пройдзе пасяджэнне Парламенцкага камітэта парламенцкага вымярэння Цэнтральна-Еўрапейскай ініцыятывы. Дэлегацыі 12 краін прымуць у ім удзел. Беларусь старшынствуе ў ЦЕІ ў 2017 годзе, пасяджэнне камітэта пройдзе на тэму "Інтэлектуалізацыя эканомікі ў рэгіёне ЦЕІ: інавацыйная вытворчасць, кіраванне і чалавечы капітал". Як адзначыў Сяргей Рахманаў, прапанаваная тэма выклікала вялікі інтарэс з боку ЦЕІ, а намеснік генеральнага сакратара Цэнтральна-Еўрапейскай ініцыятывы Эрык Чарновіц, які прыме ўдзел у рабоце, ужо выказаў упэўненасць у пазітыўным выніку маючага адбыцца пасяджэння.
Старшыня Пастаяннай камісіі Савета Рэспублікі дадаў, што сёння ў Беларусі складваецца пазітыўная дынаміка ў адносінах з Захадам, і гэтыя адносіны будуць развівацца. Але прыярытэтным напрамкам для Беларусі застаецца Усход.