Прамовы і інтэрв’ю
Рачкоў на пасяджэнні Пасткама ПА АБСЕ: Беларусь выступае за фарміраванне новай архітэктуры бяспекі
Фота з архiва
4 ліпеня, Мінск /Кар. БЕЛТА/. Беларусь прапануе засяродзіць намаганні на аднаўленні прафесійнага палітычнага і ваенна-палітычнага дыялогу, развіцці мер даверу і транспарэнтнасці, аднаўленні кантактаў паміж экспертамі і пошуку ўзаемапрымальных рашэнняў па найбольш вострых пытаннях бяспекі. Аб гэтым у час пасяджэння Пастаяннага камітэта ПА АБСЕ сказаў старшыня Пастаяннай камісіі Палаты прадстаўнікоў па міжнародных справах Сяргей Рачкоў, паведамляе БЕЛТА.
У пачатку выступлення Сяргей Рачкоў адзначыў станоўчыя дзеянні нацыянальнай дэлегацыі Нідэрландаў і кіраўніцтва Асамблеі па забеспячэнні ўдзелу беларускай дэлегацыі ў сесіі.
"Мы праводзім цяперашнюю сесію Парламенцкай асамблеі АБСЕ ва ўмовах працяглага крызісу еўрапейскай бяспекі. Ваенны канфлікт ва Усходняй Еўропе, разбурэнне механізмаў кантролю над узбраеннямі, паглыбленне палітычнага расколу на прасторы АБСЕ і нарастаючы недавер паміж дзяржавамі сведчаць аб тым, што ранейшая мадэль забеспячэння бяспекі на еўрапейскім кантыненце больш не працуе, - сказаў Сяргей Рачкоў. - На жаль, многія дыскусіі ў нашай арганізацыі па-ранейшаму сканцэнтраваны на наступствах падзей, што адбываюцца. Аднак без сумленнай размовы аб першапрычынах крызісу немагчыма знайсці ўстойлівыя рашэнні і забяспечыць доўгатэрміновы мір".
Паводле слоў старшыні Пастаяннай камісіі Палаты прадстаўнікоў па міжнародных справах, на працягу апошніх дзесяцігоддзяў прынцып непадзельнасці бяспекі паступова страчваў сваё практычнае значэнне: "Усё часцей бяспека адных дзяржаў забяспечвалася без уліку інтарэсаў іншых. У выніку прастора супрацоўніцтва, якая стваралася пакаленнямі палітыкаў і дыпламатаў, аказалася падарванай, а сама АБСЕ ўсё часцей становіцца пляцоўкай для абмену ўзаемнымі абвінавачваннямі замест дыялогу і пошуку кампрамісаў".
"Відавочна, што ні санкцыйны націск, ні нарошчванне ваеннай інфраструктуры, ні палітыка ізаляцыі не здольны забяспечыць трывалы мір і стабільнасць. Наадварот, такія падыходы толькі замацоўваюць канфрантацыю і зніжаюць магчымасці для дыпламатычнага ўрэгулявання крызісных сітуацый. Мы ўпэўнены, што настаў час вяртацца, у тым ліку ў Парламенцкай асамблеі АБСЕ, да сур'ёзнай размовы аб будучыні агульнаеўрапейскай і еўразійскай бяспекі. Такі дыялог павінен грунтавацца на раўнапраўі дзяржаў, павазе суверэнітэту, адмове ад палітыкі выключэння і гатоўнасці ўлічваць законныя інтарэсы ўсіх удзельнікаў", - сказаў Сяргей Рачкоў.
Спікер звярнуў увагу, што Беларусь паслядоўна выступае за фарміраванне новай архітэктуры бяспекі на еўразійскай прасторы: "Размова ідзе не аб замене існуючых механізмаў новымі блокавымі канструкцыямі, а аб стварэнні сістэмы, якая забяспечвала б бяспеку для ўсіх дзяржаў і выключыла б практыку ўмацавання ўласнай бяспекі за кошт бяспекі іншых".
"Мы прапануем засяродзіць намаганні на аднаўленні прафесійнага палітычнага і ваенна-палітычнага дыялогу, развіцці мер даверу і транспарэнтнасці, аднаўленні кантактаў паміж экспертамі і пошуку ўзаемапрымальных рашэнняў па найбольш важных пытаннях бяспекі. Нашы канцэптуальныя прапановы прадстаўлены ў дакуменце "Хартыя разнастайнасці і шматпалярнасці ў XXI стагоддзі", - сказаў Сяргей Рачкоў.
Як заўважыў старшыня Пастаяннай камісіі Палаты прадстаўнікоў па міжнародных справах адносна ўнесеных на разгляд бягучай сесіі Парламенцкай асамблеі АБСЕ дакументаў, ёсць перакананне, што ініцыяваная шведскім парламентарыем дадатковая рэзалюцыя па Беларусі мае антыбеларускую накіраванасць і мае відавочна прадузяты і ангажыраваны характар. "Настойліва заклікаем ініцыятараў праекта рэзалюцыі па Беларусі не ўмешвацца ва ўнутраныя справы нашай краіны, прыкрываючыся ўяўным клопатам аб правах чалавека і рэгіянальнай бяспецы, і адклікаць гэты дакумент", - сказаў на заканчэнне Сяргей Рачкоў.
Дэлегацыя Нацыянальнага сходу Беларусі ў Парламенцкай асамблеі АБСЕ пад кіраўніцтвам старшыні Пастаяннай камісіі Палаты прадстаўнікоў па міжнародных справах Сяргея Рачкова 4-6 ліпеня прымае ўдзел у 33-й штогадовай сесіі ПА АБСЕ на тэму "Міжнароднае права і агульныя прынцыпы: асновы бяспекі і супрацоўніцтва ў рэгіёне АБСЕ", якая праходзіць у Гаазе (Нідэрланды).
версія для друку
зрабіць стартавай
дабавіць у выбранае