Прамовы і інтэрв’ю

Пётр Руднік: Правядзенне Года беражлівасці дапаможа паскорыць працэс мадэрнізацыі прадпрыемстваў

10 студзеня, Магілёў /Сяргей Кулягін - БЕЛТА/. Правядзенне Года беражлівасці ў Беларусі дапаможа паскорыць працэс мадэрнізацыі прадпрыемстваў, будзе садзейнічаць павышэнню ўзроўню заработнай платы. Такое меркаванне выказаў у размове з карэспандэнтам БЕЛТА старшыня Магілёўскага аблвыканкама Пётр Руднік.

Паводле яго слоў, у жорсткіх умовах рыначнай канкурэнцыі сёння ўсе прадпрыемствы і арганізацыі нацэлены на тое, каб эканоміць рэсурсы і сродкі. І толькі ў некаторых кіраўнікоў яшчэ прысутнічае доля інертнасці, якая перайшла з часоў былога СССР. "Год беражлівасці надасць імпульс для прадаўжэння пачатай работы ў адпаведнасці з Дырэктывай нумар 3, дасць магчымасць кіраўнікам па-новаму паглядзець на арганізацыю працы, знайсці дадатковыя рэзервы для беражлівасці і эканоміі. Паколькі часта мы не заўважаем, што ў нас непасрэдна "пад нагамі ляжаць грошы", а гэта могуць быць дадатковыя фінансавыя ўліванні ў развіццё прадпрыемстваў, павышэнне заработнай платы работнікаў. У гэтай рабоце неабходна кіравацца прынцыпам: збярог пяць рублёў - атрымай у якасці бонусу рубель да зарплаты", - лічыць Пётр Руднік.

На яго думку, Год беражлівасці аб'яўлены вельмі дарэчы, таму што ў гэтых адносінах у нас яшчэ вельмі шмат нявыкарыстаных рэзерваў як у плане павышэння прадукцыйнасці працы, так і эканоміі энергарэсурсаў. Кожнаму прадпрыемству і арганізацыі ёсць над чым тут працаваць, каб выправіць сітуацыю ў лепшы бок. "Я ўпэўнены, што, выконваючы ў тым ліку даручэнне кіраўніка дзяржавы ў частцы мадэрнізацыі кожнага прадпрыемства, мы ў будучым сэканомім немалыя рэсурсы за кошт укаранення высокапрадукцыйных менш энергаёмістых інавацыйных тэхналогій у вытворчы працэс. Такія планы мадэрнізацыі ў нас ёсць па кожнаму прадпрыемству. Больш таго, пастаўлена задача распрацаваць перспектыўныя планы развіцця ўсіх раённых цэнтраў і гарадоў абласнога падпарадкавання", - сказаў губернатар.

У бягучым годзе адной з важнейшых задач абласной выканаўчай улады стане работа па прыцягненню інвестыцый у рэгіён і стварэнню ў кожным раёне не менш за 10 мікрапрадпрыемстваў. Рост здаровай канкурэнцыі на месцах таксама будзе служыць таму, каб адносіцца беражліва да існуючых рэсурсаў, працаваць над зніжэннем сабекошту і павышэннем канкурэнтаздольнасці выпускаемай прадукцыі. Новыя сучасныя прадпрыемствы павінны 50 працэнтаў вырабаў экспартаваць. У якасці прыкладу Пётр Руднік прывёў ААТ "Газасілікат" (Магілёўскі раён), якое напярэдадні новага года ўвяло ў строй новую кітайскую лінію па вытворчасці каляровай абліцовачнай цэглы. Гэта прадпрыемства 95 працэнтаў выпускаемай прадукцыі экспартуе, а за кошт укаранення ў вытворчасць самых сучасных тэхналогій атрымлівае значную эканомію матэрыяльных і энергарэсурсаў. У выніку прадукцыя прадпрыемства сёння канкурэнтаздольная на ўнутраным і знешнім рынках.

версія для друку

зрабіць стартавай

дабавіць у выбранае