Прамовы і інтэрв’ю

Нацыянальная бяспека без перанапружання эканомікі. Эксперт растлумачыў, навошта Беларусі "Арэшнік" i ядзерная зброя

Фота з архiва

8 лістапада, Мінск /Кар. БЕЛТА/. Ядзерная зброя і сістэма "Арэшнік" з'яўляюцца элементамі стратэгічнага стрымлівання, якія даюць магчымасць Беларусі гарантаваць сваю бяспеку без перанапружання эканомікі. Такое меркаванне ў праекце "У тэме" на YouTube-канале БЕЛТА выказаў дэпутат Палаты прадстаўнікоў Мікалай Бузін.

"Ядзерная зброя і сістэма "Арэшнік" - гэта элементы стратэгічнага стрымлівання. Пра гэта гаварылася ўжо не адзін раз, але паколькі Захад увесь час манкіруе гэтым напрамкам, нам даводзіцца нагадваць і тлумачыць, што пры неабходнасці яна будзе выкарыстана", - сказаў Мікалай Бузін.

Дэпутат звярнуў увагу, што заходнія СМІ і палітычныя эліты мусіруюць тэзіс аб тым, што Беларусь і Расія не стануць прымяняць існуючыя ў іх арсеналы для адбіцця магчымай агрэсіі: "Шчыра кажучы, не магу зразумець, чым гэта абумоўлена. Ім расказваюць і тлумачаць на пальцах, у якім выпадку будзе выкарыстана гэта зброя, але атрымліваецца - як аб сцяну гарохам".

Мікалай Бузін падкрэсліў, што Беларусь не выношвае агрэсіўных планаў адносна іншых краін, аб чым рэгулярна гаворыць і кіраўнік дзяржавы. Пры гэтым для забеспячэння ўласнай бяспекі ў Беларусі ёсць усе неабходныя сродкі, у тым ліку тактычная ядзерная зброя. Такім чынам, дзяржаве не трэба ўцягвацца ў гонку ўзбраенняў і траціць вялізныя сродкі на абарону.

"Ядзерная зброя - гэта элемент асіметрычнага ўздзеяння на праціўніка. Мы не ўцягваемся ў гонку ўзбраенняў, не выдзяляем 5 працэнтаў ВУП на вайну, аб чым сёння гавораць Злучаныя Штаты і Еўропа. Але мы маем у сваім арсенале сродкі, якія даюць магчымасць забяспечыць нацыянальную і ваенную бяспеку без перанапружання ўласнай эканомікі, - упэўнены дэпутат. - Тут, напэўна, варта звярнуць увагу, калі мы задзейнічаем існуючы арсенал: калі вораг пяройдзе нашу граніцу або зробіць нейкія супрацьпраўныя дзеянні ў адносінах да нашай дзяржавы".

Ён канстатаваў, што ў Беларусі помняць урокі гісторыі і не дапусцяць паўтарэння падзей пачатку Вялікай Айчыннай вайны. "У 1939-1941 гадах нам расказвалі, што ніхто на нас не будзе нападаць. Нашы папярэднікі гэтаму часткова верылі. Ёсць такі выраз: давярай, але правярай. Таму мы няўхільна трымаемся прынцыпу, што порах трэба трымаць сухім, - адзначыў Мікалай Бузін. - Мы нікога не запалохваем, нікому не пагражаем. Але мы маем усе сродкі і ў неабходны момант выкарыстаем іх для забеспячэння бяспекі краіны і народа. Мы не будзем чакаць паўтарэння 1941 года, калі па нашай зямлі пройдуць танкі, над ёй паляцяць самалёты, а на нас упадуць бомбы. Мы гэтага не дапусцім".-0-

*Праект створаны за кошт сродкаў мэтавага збору на вытворчасць нацыянальнага кантэнту

версія для друку

зрабіць стартавай

дабавіць у выбранае