Прамовы і інтэрв’ю
Напружаная i няпростая. У Мінабароны ахарактарызавалі абстаноўку на заходнім напрамку
Фота з архiва
26 снежня, Мінск /Кар. БЕЛТА/. Ваенна-палітычная абстаноўка на заходнім напрамку напружаная і няпростая. Аб гэтым у эфіры "Першага інфармацыйнага" заявіў міністр абароны Беларусі Віктар Хрэнін, паведамляе карэспандэнт БЕЛТА.
"Абстаноўку (на заходнім напрамку. - Заўвага БЕЛТА) можна ахарактарызаваць як напружаную, схільную да радыкалізацыі, няпростую. Мы гэта бачым па тых дзеяннях, якія ідуць перш за ўсё ад кіраўніцтва суседніх з намі краін, якія не хочуць разумець, што трэба зніжаць градус ваеннага напружання. Ён даволі сур'ёзнага абвастрэння, перш за ўсё ў інфармацыйным полі. Але і дзеянні, якія ажыццяўляе кіраўніцтва суседніх краін, яны сведчаць аб тым, і яны не ўтойваюць таго, што ідзе падрыхтоўка да вайны. У іх пагроза Расія, зразумела, гэта і Беларусь. У нас Саюзная дзяржава, будуць ваяваць з намі", - сказаў Віктар Хрэнін.
У якасці прыкладу ён прывёў заявы аб жаданні польскага кіраўніцтва стварыць самую магутную армію. "Нямецкае кіраўніцтва зусім нядаўна "вызначылася". Яны таксама гавораць, што хочуць стварыць магутную армію. Вы ведаеце, гэта нагадвае сітуацыю напярэдадні Другой сусветнай вайны. Таксама палякі сапернічалі з немцамі. Гісторыкі ўжо далі шмат ацэнак гэтым пытанням, тут зноў пытанне ў тым, хто прэтэндуе на рэгіянальнае лідарства. Французы там "вылучаюцца". Не адстаюць краіны Балтыі са сваім агрэсіўным кіраўніцтвам, ну, яны робяць дзеянні ў рамках выдзялення фінансаў - больш за 5 працэнтаў ВУП, і гэта ўжо сведчыць аб тым, што гэта перадваенны бюджэт. Таму мы лічым, што гэта не пустыя словы, не нейкі блеф ад гэтых палітыкаў гучыць", - адзначыў міністр.
Кіраўнік беларускага ваеннага ведамства таксама звярнуў увагу на падрыхтоўку інфраструктуры суседніх краін, колькасць розных вучэнняў і трэніровак, мадэрнізацыю марскіх партоў для дастаўкі ўзбраення, аэрадромаў для прыёму самалётаў, развіццё артылерыі, стварэнне новых дывізій. Таксама ў рамках аперацыі "Атлантычная рашучасць" узмоцнена перадавая прысутнасць войскаў НАТА, якія знаходзяцца ў суседніх з Беларуссю краінах.
"Тое ўзбраенне, якое яны купляюць і ў вялікай колькасці, затрачваючы велізарныя фінансавыя сродкі. Палякі плануюць закупіць да 1 тыс. танкаў і да 32 самалётаў F-35. Гэта сучасны, вельмі нядрэнны самалёт, здольны несці ядзерную зброю і наносіць удары", - адзначыў Віктар Хрэнін.
Узнікае лагічнае пытанне: для чаго ўсё гэта патрэбна? "Ідзе папярэдняя падрыхтоўка да вядзення ваенных дзеянняў, інакш кажучы, да вайны", - упэўнены Віктар Хрэнін. - Называюць розныя тэрміны. Мы іх таксама чулі ў СМІ. Міністр абароны краіны, якая развязала дзве сусветныя вайны, спасылаўся на нейкіх аналітыкаў, што ледзь ці не апошняе лета мы мірнае пражылі. Ну як можна спакойна на гэта глядзець? Не забываем, што канфлікт прадаўжаецца на поўдні ад нашых граніц. Як і чым ён завершыцца - сказаць цяжка. Бо там таксама агрэсіўнае і непрадказальнае кіраўніцтва. Яны ж гавораць адкрыта, што мы "суагрэсары", і там розныя ў іх меркаванні існуюць: трэба ці не трэба па нас удары наносіць", - дадаў міністр.
Што ёсць у Беларусі для процістаяння рызыкам і пагрозам? "Мы рыхтуемся, займаемся будаўніцтвам, развіццём нашых Узброеных Сіл на планавай аснове. Мы не імкнёмся уцягвацца ў гонку ўзбраенняў. На гэты момант можна глядзець па-рознаму. Уцягнуўшыся ў гонку ўзбраенняў, мы разбурым сацыяльныя праграмы. Народ можа абурацца з-за таго, што мы будуем сацыяльную дзяржаву, а тут цяпер будзем траціць на ўзбраенне. Таму, зыходзячы з прынцыпу разумнай дастатковасці тых фінансавых сродкаў, якія выдзяляюцца, мы і займаемся сваім планаваннем. У нас дастаткова таго ўзбраення, якое ёсць. Хоць многія скептыкі гавораць, што яно савецкае, устарэлае. Нічога падобнага. Яно добра ваюе. А калі крыху дабавіць мадэрнізацыі, добрых сродкаў сувязі, абароны, радыёэлектроннай барацьбы, беспілотнікі цяпер з'явіліся, то гэта становіцца вельмі добрым, такім комплексным ваенным ядром, якое неабходна для абароны. Мы не збіраемся праяўляць агрэсіі, мы нікога не разглядаем у якасці ворага, але мы гаворым аб тым, што мы будзем абараняць сваю краіну, калі хтосьці хоча вырашаць пытанні з пункту гледжання ваеннай сілы", - падкрэсліў міністр. Ён таксама адзначыў добры ўзровень узаемадзеяння ў рамках ваенна-тэхнічнага супрацоўніцтва з Расійскай Федэрацыяй.
Фактарам стратэгічнага стрымлівання, паводле слоў кіраўніка ваеннага ведамства, стала размяшчэнне на тэрыторыі Беларусі тактычнай ядзернай зброі. "Яна ў нас ёсць, усё нармальна. Прэзідэнт таксама перыядычна падкрэслівае гэта. Зусім нядаўна яна была абноўлена. Крайняя выкананая задача нашых кіраўнікоў дзяржаў - комплекс "Арэшнік" размешчаны на нашай тэрыторыі, - нагадаў міністр. - Гэта наша рэакцыя на іх (Захаду. - Заўвага БЕЛТА) агрэсію, агрэсіўныя дзеянні, на іх заяву, што яны збіраюцца з намі ваяваць. Мы гаворым: не трэба, не хочам мы ваяваць. Давайце дамаўляцца. А вы ведаеце, мне здаецца, што прыйдуць разумныя палітыкі. Такія, як наш кіраўнік дзяржавы, прэзідэнт Расіі, лідар Кітая. Тыя людзі, якія выдатна разумеюць, што не трэба бразгаць зброяй. Гэта не прывядзе ні да чаго добрага. Ёсць шмат пытанняў у эканоміцы, сацыяльнай сферы, ахове здароўя, адукацыі. Вось дзе трэба займацца. Ваенныя павінны праводзіць спаборніцтвы на тактычных палях і ніколі не прымяняць гэту зброю. На сённяшні дзень ёсць больш сур'ёзныя пагрозы ў свеце, якія існуюць у выглядзе тэрарыстычных дзеянняў, гандлю наркотыкамі. Вось дзе трэба бар'еры ваенным людзям ставіць, а не сутыкаць не проста арміі, а цэлыя народы".
Ён таксама адзначыў, што "Арэшнік" можа прымяняцца як ракетная ядзерная зброя, так і простая. Далёкасць прымянення ракеты - да 5 тыс. км. Адзначаючы стрымліваючы фактар наяўнасці "Арэшніка", Віктар Хрэнін нагадаў, што Беларусь не збіраецца ваяваць, чым заходнія палітыкі палохаюць насельніцтва сваіх краін.
"Яны прадаўжаюць рабіць з нас ворага. Што мы, як амерыканцы любяць гаварыць, дрэнныя хлопцы, што мы тут цяпер нападзём. Такога ніколі не будзе. Але ім выгадна запалохваць сваё насельніцтва, маніпуляваць ім, каб траціць велізарныя сродкі. Вы паглядзіце, якія сродкі трацяцца на ваенныя патрэбы, якія вытворчасці разгортваюцца. Была заява, не ведаю, наколькі яна праўдзівая, што Польшча плануе ў наступным годзе выдзеліць больш за 10 млрд еўра для ўмацавання граніцы з Рэспублікай Беларусь, будаваць ледзь ці не ўмацаваныя раёны. Будуйце, калі вам няма куды грошы падзець", - сказаў Віктар Хрэнін.
Кіраўнік ваеннага ведамства падкрэсліў, што нягледзячы на агрэсіўную палітыку краін Захаду, Беларусь гатова да дыялогу. "Мы не раз гаварылі пра гэта. Тут таксама хочацца сказаць, каб яны не ўспрымалі наша імкненне да міралюбнасці як слабасць. Яны ж думаюць, што мы тут спалохаліся. Нічога мы не спалохаліся. Але мы добра разумеем тое, што трэба, каб гаварылі палітыкі, трэба, каб гаварылі людзі словамі, а не залпамі зброі. І мы да гэтага гатовы, Прэзідэнт гэта неаднаразова падкрэсліваў. Таму мы гаворым, давайце будзем мірна дамаўляцца", - адзначыў міністр.
версія для друку
зрабіць стартавай
дабавіць у выбранае