Прамовы і інтэрв’ю

Мясніковіч: у ЕАЭС выпрацоўваюць сістэмныя меры па забеспячэнні эканамічнай стабільнасці ва ўмовах COVID-19

Міхаіл Мясніковіч. Фота з архiва

14 красавіка, Масква /Эдуард Півавар - БЕЛТА/. У Еўразійскім эканамічным саюзе выпрацоўваюцца меры па забеспячэнні эканамічнай стабільнасці ва ўмовах распаўсюджвання новай каранавіруснай інфекцыі. Аб гэтым паведаміў старшыня Калегіі Еўразійскай эканамічнай камісіі Міхаіл Мясніковіч сёння на рабочай сустрэчы членаў Вышэйшага Еўразійскага эканамічнага савета, якая адбылася ў рэжыме відэаканферэнцыі, перадае карэспандэнт БЕЛТА.

"Ідзе выпрацоўка сумесна з урадамі сістэмных мер па забеспячэнні эканамічнай стабільнасці", - сказаў Міхаіл Мясніковіч.

Дакладваючы кіраўнікам дзяржаў ЕАЭС аб ужо прынятых рашэннях, старшыня Калегіі расказаў, што для паляпшэння забеспячэння сродкамі індывідуальнай аховы і медыцынскай тэхнікай Савет ЕЭК вырашыў устанавіць нулявыя стаўкі ўвазных мытных пошлін на гэтыя тавары. Таксама часова адменены шэраг працэдур па ацэнцы адпаведнасці і мытнай ачыстцы медыцынскіх тавараў у мэтах іх хуткага паступлення на рынкі краін саюза. Калегія ЕЭК увяла часовую забарону на вываз з ЕАЭС сродкаў індывідуальнай аховы, сродкаў дэзынфекцыі, прадукцыі медыцынскага прызначэння. Аналагічныя меры прыняты па харчовай групе тавараў. "Пералік узгоднены краінамі саюза, ён можа дапаўняцца", - адзначыў Міхаіл Мясніковіч.

"Пастаянна праводзіцца ўзаемадзеянне з упаўнаважанымі органамі дзяржаў - членаў саюза па ўрэгуляванні сітуацыі з узаемнымі пастаўкамі прадуктаў харчавання, працэдурамі праходжання санітарна-эпідэміялагічнага кантролю вадзіцелямі грузавых транспартных сродкаў пры перасячэнні граніц, - прадоўжыў ён. - 25 сакавіка на пазачарговым Савеце ЕЭК прыняты адпаведны нарматыўны акт. Аднак вымушаны канстатаваць, што ў шэрагу выпадкаў адступленне ад норм мае месца. Працуем кропкава, акрамя таго, ідзе абмен інфармацыяй аб прымаемых краінамі мерах у гандлёва-лагістычнай і санітарна-эпідэміялагічнай сферах".

ЕЭК распрацавала комплекс сумесных антыкрызісных мер, якія адобраны 10 красавіка Еўразійскім міжурадавым саветам. "Першае - гэта пакет тэрміновых часовых мер стабілізацыйнага характару, у першую чаргу пры правядзенні санітарна-эпідэміялагічных мерапрыемстваў, - адзначыў Міхаіл Мясніковіч. - Таксама прадугледжана стварэнне зялёнага калідора для імпарту крытычна важных тавараў, зніжэнне мытных пошлін на камплектуючыя і матэрыялы для асобных галін эканомікі, забеспячэнне бесперабойнай работы транспарту, грузавых перавозак з улікам, вядома ж, выканання санітарна-эпідэміялагічных патрабаванняў".

Другі раздзел мер уключае забеспячэнне макраэканамічнай стабільнасці і ўстойлівасці функцыянавання фінансавых рынкаў і плацежных сістэм, падтрымку прадпрыемстваў рэальнага сектара эканомікі, больш актыўны ўдзел рэгіянальных фінансавых інстытутаў, такіх як Еўразійскі фонд стабілізацыі і развіцця і Еўразійскі банк развіцця, у падтрымцы эканомікі краін ЕАЭС ва ўмовах пандэміі.

 "Дзе мы бачым рэзервы? Яны ў безумоўным выкананні дамоўленасцей, якія дасягаюцца краінамі. Трэба мінімізаваць абмежаванні ва ўзаемным гандлі і ўмацоўваць давер", - рэзюмаваў старшыня Калегіі ЕЭК.

версія для друку

зрабіць стартавай

дабавіць у выбранае