Прамовы і інтэрв’ю
Лукашэнка: свет уцягваецца ў чарговую шалёную гонку ўзбраенняў, у тым ліку ядзерных
23 лютага, Мінск /Кар. БЕЛТА/. Свет уцягваецца ў чарговую шалёную гонку ўзбраенняў, у тым ліку ядзерных, і цяпер важна зрабіць усё, каб не дапусціць новай сусветнай бойні. Аб гэтым Прэзідэнт Беларусі Аляксандр Лукашэнка заявіў на ўрачыстай цырымоніі ўручэння дзяржузнагарод і генеральскіх пагонаў афіцэрам сілавога блока краіны. Мерапрыемства арганізавана ў Палацы Незалежнасці і прымеркавана да аднаго з галоўных свят краіны - Дня абаронцаў Айчыны і Узброеных Сіл Беларусі, перадае карэспандэнт БЕЛТА.
Кіраўнік дзяржавы нагадаў, што ў гэтым годзе спаўняецца 85 гадоў з пачатку Вялікай Айчыннай вайны, калі ў краіну прыйшла вялікая бяда, з якой народы СССР справіліся цаной неймаверных страт і нягод.
"Мы бачым, што сёння міжнародная абстаноўка падобная да таго няпростага перыяду ў нашай краіне. Захадам мэтанакіравана нагнятаецца ваенная істэрыя, бесперапынна растуць ваенныя бюджэты (краін. - Заўвага БЕЛТА) НАТА, паскараюцца тэмпы мілітарызацыі Еўропы, асабліва нашых суседзяў на Захадзе", - звярнуў увагу Прэзідэнт.
Аляксандр Лукашэнка падкрэсліў, што сістэма стрымак і проціваг, якая раней забяспечвала агульнаеўрапейскую бяспеку, разбурана. "Свет уцягваецца ў чарговую шалёную гонку ўзбраенняў. У тым ліку ядзерных", - сказаў ён.
У такіх умовах Прэзідэнт лічыць асноўнай задачай для ўсіх людзей добрай волі, якія жывуць на планеце, зрабіць усё магчымае і немагчымае, каб не дапусціць новай сусветнай бойні.
"Мы рабілі і будзем гэта рабіць, таму што такія патрабаванні часу. Народ Беларусі павінен быць упэўнены ў нашай здольнасці, здольнасці ваенных забяспечыць бяспеку краіны, - заявіў Аляксандр Лукашэнка. - Галоўнымі нашымі аргументамі павінна быць адзінства народа, моцная армія, высокі маральны дух, вывучка нашых салдат і афіцэраў, усіх сілавых структур".
Кіраўнік дзяржавы таксама адзначыў неабходнасць бесперапыннага ўмацавання абараназдольнасці краіны і забеспячэння яе бяспекі.
версія для друку
зрабіць стартавай
дабавіць у выбранае