Прамовы і інтэрв’ю
Лукашэнка даручыў нарасціць аб'ёмы выпуску тканін на "Камволі" да 7-8 млн пагонных метраў
8 снежня, Мінск /Юлія Дылянок - БЕЛТА/. Прэзідэнт Беларусі Аляксандр Лукашэнка даручыў нарасціць аб'ёмы вытворчасці тканін на ААТ "Камволь" да 7-8 млн паг. м у год. Аб гэтым кіраўнік дзяржавы заявіў сёння ў час наведвання прадпрыемства, перадае карэспандэнт БЕЛТА.
"Створана добрая вытворчасць, якой вы і я, можа, будзем задаволены. Але гэта яшчэ будучы год. Думаю, вы справіцеся і выйдзеце на тыя тэмпы і аб'ёмы да канца года, якія мы плануем дасягнуць праз два гады, па вытворчасці 6 млн паг. м тканіны. Але 6 млн - гэта не мяжа, нават на гэтай вытворчасці. Мінімум 7 млн, а можа, і 8 млн - потым паглядзім - у гэтых сценах, з гэтых машын, на гэтай вытворчасці мы павінны атрымаць", - сказаў Аляксандр Лукашэнка, размаўляючы з працоўным калектывам "Камволя".
Кіраўнік дзяржавы адзначыў, што ў ходзе размовы з кіраўніцтвам турэцкай кампаніі Zen Led, з якой у "Камволя" заключана пагадненне аб перадачы тэхналогій і дылерскі кантракт, закраналася пытанне аб перспектывах павелічэння вытворчых магутнасцей для вырабу 10-12 млн паг. м тканіны ў год: "Яны мне адказалі, што на працягу 3-4 гадоў магчыма, ствараючы брэнд, выйсці на продаж 12 млн. Можа, памыліліся, няхай 10 млн. Але гэта 10 млн! А некалі мы выраблялі 20 млн. Так, гэта была не тая тканіна, зусім іншая вытворчасць. На рынку добрая тканіна патрэбна".
Аляксандр Лукашэнка канстатаваў, што на сённяшні дзень аб'ём сусветнага рынку камвольных тканін складае каля 120 млн паг. м. "Хто нам перашкаджае ў гэтых 120 млн прадаваць сваіх 10-12 млн? Не трэба думаць, што цяпер 120 млн і 130 млн не прадаш. Не трэба. Гаворачы па-народнаму, улазь у гэтыя 120 млн. Вы павінны прадаваць больш", - сказаў Прэзідэнт.
Таксама ў час наведвання ААТ "Камволь" зайшла размова пра лёс ААТ "Сукно", якое знаходзіцца ў стадыі перадсанацыі. Як раней, так і сёння выказваліся розныя варыянты далейшых дзеянняў - ад далучэння да "Камволя" з аб'ёмам выпускаемай прадукцыі 700-800 тыс. паг. м у год (пры цяперашніх крыху больш за 300 тыс.) да паўнацэннага адраджэння прадпрыемства на яго існуючых магутнасцях з істотным павелічэннем вытворчых магчымасцей.
Выслухаўшы прапановы, Аляксандр Лукашэнка пацікавіўся меркаваннем кіраўніцтва Zen Led адносна магчымасцей беларускага суконнага прадпрыемства і тэрмінаў, за якія можна яго мадэрнізаваць і выйсці на стабільны продаж прадукцыі. Старшыня Савета праўлення кампаніі Сабры Даган адзначыў, што на працягу двух гадоў магчыма выйсці на вытворчасць і продаж каля 4 млн паг. м суконнай тканіны. "Чаму чалавек можа прадаць 4 млн паг. м суконнай тканіны ў год, а вы мне прапануеце вырабляць у 10 разоў менш?" - задаўся пытаннем кіраўнік дзяржавы, звяртаючыся да прадстаўнікоў дзяржорганаў.
Прэзідэнт даручыў дасканала прапрацаваць варыянты захавання паўнацэннай суконнай вытворчасці ў Беларусі.
версія для друку
зрабіць стартавай
дабавіць у выбранае