Прамовы і інтэрв’ю

Лукашэнка асабліва адзначыў прысутнасць на "Славянскім базары" калектываў з краін ШАС

Фота з архiва

11 ліпеня, Віцебск /Кар. БЕЛТА/. Прэзідэнт Беларусі Аляксандр Лукашэнка на цырымоніі адкрыцця міжнароднага фестывалю мастацтваў "Славянскі базар у Віцебску" асабліва адзначыў прысутнасць на гэтым форуме калектываў з краін Шанхайскай арганізацыі супрацоўніцтва, перадае карэспандэнт БЕЛТА.

"Славянская душа бязмежная ў сваёй адкрытасці свету. Таму наш фестываль даўно выйшаў за геаграфічныя рамкі славянскага братэрства", - падкрэсліў Аляксандр Лукашэнка.

Цяперашні форум сабраў аднадумцаў з чатырох дзясяткаў краін - ад Расіі да Індыі і ад Кітая да Калумбіі.

"Сёння мы ўпершыню вітаем міністраў культуры і творчыя калектывы з краін Шанхайскай арганізацыі супрацоўніцтва - цяпер ужо і нашай арганізацыі. Гэта знакавая падзея ў жыцці краіны. Мы далучыліся да супольніцтва дзяржаў, за якімі будучыня. Будучыня развіцця чалавецтва на прынцыпах раўнапраўя, павагі і стварэння. Прынамсі, сёння пануе ў ШАС такі дух", - сказаў Прэзідэнт.

У праграме цяперашняга фестывалю - Дзень нацыянальных культур краін ШАС. "Няхай ён стане сімвалічным пачаткам нашага сумеснага шляху да агульных мэт. Мэт, якія з'ядналі больш за палову насельніцтва планеты - людзей, якім блізкая і зразумелая філасофія нашага фестывалю. У ёй - ключ да міру і ўзаемаразумення, які нам даюць людзі мастацтва, таленавітыя людзі", - пажадаў беларускі лідар.

версія для друку

зрабіць стартавай

дабавіць у выбранае