Прамовы і інтэрв’ю

Качанава - старшыні ПАРЛАЦІНА: нашы падыходы да міралюбівага ўладкавання шматпалярнага свету ідэнтычныя

23 красавіка, Мінск /Кар. БЕЛТА/. Падыходы Беларусі і Парламента краін Лацінскай Амерыкі і Карыбскага басейна (ПАРЛАЦІНА) да міралюбівага ўладкавання шматпалярнага свету абсалютна ідэнтычныя. Гэта адзначыла старшыня Савета Рэспублікі Нацыянальнага сходу Беларусі Наталля Качанава на сустрэчы з дэлегацыяй ПАРЛАЦІНА на чале са старшынёй парламента Раланда Гансалесам Патрысіа, перадае карэспандэнт БЕЛТА.

"За 60 гадоў сваёй дзейнасці ПАРЛАЦІНА зарэкамендаваў сябе ў якасці сур'ёзнай парламенцкай арганізацыі. Мы ганарымся супрацоўніцтвам з вамі. Паміж нашымі парламентамі ўстанавіліся добрыя адносіны, якія мы высока цэнім. Яны даюць магчымасць нам супрацоўнічаць і прымаць узважаныя, вывераныя рашэнні", - адзначыла Наталля Качанава, звяртаючыся да дэлегацыі ПАРЛАЦІНА.

Старшыня Савета Рэспублікі ўказала на тое, што ў Нацыянальным сходзе Беларусі дзейнічаюць пяць груп дружбы, якія ўзаемадзейнічаюць з рознымі дзяржавамі Лацінскай Амерыкі. "Мы стараемся выбудоўваць цеснае ўзаемадзеянне паміж нашымі краінамі, таму што па многіх аспектах нашы падыходы вельмі падобныя", - сказала спікер.

Таксама Наталля Качанава звярнула ўвагу на ролю парламентарыяў у захаванні міру і ўмацаванні бяспекі праз розныя формы ўзаемадзеяння. "Мы бачым, што ў свеце адбываюцца канфлікты, баявыя дзеянні. Гэта не можа нас не хваляваць. Мы падтрымліваем вырашэнне розных канфліктаў толькі праз мірнае ўрэгуляванне за сталом перагавораў. Гэта тое, што дасць магчымасць забяспечыць мір і далейшае развіццё чалавецтва. Для нас, парламентарыяў, важна ўзаемадзеянне на міжнародных пляцоўках. Напрыклад, зусім нядаўна адбылася 152-я Асамблея Міжпарламенцкага саюза, дзе нашы калегі развівалі міралюбівыя ініцыятывы. Мы з вялікай радасцю вітаем тое, што сёння вы з'яўляецеся наглядальнікамі ў Міжпарламенцкай асамблеі, і нашы падыходы да шматпалярнасці свету, да яго міралюбівага ўладкавання ў нас абсалютна ідэнтычныя", - падкрэсліла старшыня Савета Рэспублікі.

Спікер акцэнтавала ўвагу на развіцці супрацоўніцтва з краінамі ПАРЛАЦІНА па шэрагу напрамкаў. "У нас у краіне працуюць буйныя прадпрыемствы, мы выпускаем выдатную сельскагаспадарчую, аўтамабільную тэхніку. Мы, парламентарыі, таксама павінны пашыраць гуманітарнае супрацоўніцтва, узаемадзеянне паміж нашымі маладзёжнымі, жаночымі арганізацыямі для таго, каб ведаць і разумець адзін аднаго. Мы з задавальненнем адзначаем, што за мінулы год тавараабарот паміж Беларуссю і краінамі Лацінскай Амерыкі вырас на 28 працэнтаў. Мы павінны і ў далейшым працаваць над тым, каб эканамічнае супрацоўніцтва паміж нашымі краінамі ўмацоўвалася. Мы гатовы паказаць нашы сучасныя тэхналогіі, нашы вытворчасці, прадпрыемствы, навуковыя распрацоўкі", - указала Наталля Качанава.

Старшыня Савета Рэспублікі таксама падкрэсліла, што беларускія парламентарыі гатовы зрабіць усё для таго, каб супрацоўніцтва паміж Беларуссю і краінамі ПАРЛАЦІНА было ўзаемавыгадным, а ўзаемадзеянне ў розных сферах - яшчэ больш эфектыўным.

Раланда Гансалес Патрысіа падзякаваў Наталлі Качанавай за гасцінны прыём. Ён таксама выказаў падзяку за тую падтрымку, якую Беларусь аказвае Кубе ў няпросты час. Пасля сустрэчы старшыня ПАРЛАЦІНА пакінуў запіс у кнізе ганаровых гасцей Савета Рэспублікі. Таксама для дэлегацыі была арганізавана экскурсія па музеі Савета.