Прамовы і інтэрв’ю

7 верасня, Мінск /Кар. БЕЛТА/. Мы павінны мець свае моцныя трэнерскія кадры. Аб гэтым заявіла намеснік прэм'ер-міністра Наталля Качанава сёння на сумесным пасяджэнні калегіі Міністэрства спорту і турызму і Нацыянальнага алімпійскага камітэта, дзе падводзіліся вынікі ўдзелу ў XXXI летніх Алімпійскіх гульнях, а таксама абмяркоўваліся перспектывы і планы падрыхтоўкі да летніх Гульняў-2020 у Токіа, паведамляе карэспандэнт БЕЛТА.

Віцэ-прэм'ер вылучыла тры важныя аспекты, якія дапамогуць больш паспяхова выступіць у будучым на галоўных стартах чатырохгоддзя. Першы з іх - трэнерскія кадры. "Разлічваць на замежных спецыялістаў не трэба. Яны прыязджаюць і выконваюць свае функцыі, адпрацоўваюць кантракт, але хто будзе рыхтаваць спартыўны рэзерв. Сёння не хапае беларускіх кваліфікаваных трэнераў, якія маглі б эфектыўна працаваць з моладдзю. У некаторых спартшколах і аддзяленняў штатнага спецыяліста няма па пяць-шэсць гадоў, хоць у Беларусі ёсць 11 вучылішч алімпійскага рэзерву, тры ВНУ рыхтуюць трэнераў па спорце, а 12 вышэйшых навучальных устаноў - спартыўных менеджараў і настаўнікаў фізкультуры. Другое пытанне - якасць падрыхтоўкі кадраў. Жадаючых паступіць у ВНУ шмат, а спецыялісты потым ідуць у агульнаадукацыйныя школы або наогул пакідаюць сістэму спорту. Аб гэтым не раз ужо гаварылі, і гэту праблему неабходна вырашаць", - расказала Наталля Качанава.

Важным складнікам поспеху ў спорце, на думку віцэ-прэм'ера, з'яўляецца таксама матэрыяльна-тэхнічная база. У Беларусі за апошнія дзесяць гадоў у гэтым напрамку зроблены сур'ёзны прарыў. "З боку дзяржавы былі створаны ўсе ўмовы для якаснай падрыхтоўкі да Гульняў. Разам з тым спартсмены з шэрага рэгіёнаў, дзе створаны добрыя ўмовы для трэніровак, не паказалі высокіх рэзультатаў у Рыа", - падкрэсліла віцэ-прэм'ер.

Па-ранейшаму, на думку Наталлі Качанавай, асаблівую ўвагу неабходна ўдзяляць дзіцяча-юнацкаму спорту. "Адбор дзяцей у ДЮСШ (не набор, а менавіта адбор) павінен праходзіць і пры ўдзеле федэрацый па відах спорту. Гэта аснова і будучыня грамадскіх спартыўных арганізацый. Якасць работы трэнераў у ДЮСШ вельмі важная для наступных больш высокіх рэзультатаў", - адзначыла яна.

Намеснік прэм'ер-міністра таксама засяродзіла ўвагу на недапушчальнасці парушэнняў у сістэме ДЮСШ, калі ў спартшколу прымаюцца дзеці, якія не могуць займацца па медыцынскіх паказаннях, ёсць таксама парушэнні ў наведвальнасці і напаўненні груп. "Эфектыўнасць работы спартшкол не высокая. За 2015 год з ДЮСШ у юніёрскія, маладзёжныя зборныя краіны прыйшлі менш як 1 працэнт ад навучэнцаў", - адзначыла яна.

На мінулых летніх Алімпійскіх гульнях у Рыа-дэ-Жанэйра зборная Беларусі заваявала дзевяць узнагарод і заняла 40-е месца па якасці медалёў у агульным заліку.