Прамовы і інтэрв’ю

"За мінулы год узровень тавараабароту паміж Беларуссю і Пакістанам склаў прыкладна $60 млн. Для нашых краін, якія маюць неабходны эканамічны патэнцыял і выходзяць на высокі ўзровень узаемаадносін, гэта вельмі падобна да статыстычнай хібнасці. Упэўнены, што ёсць усе перадумовы для павелічэння тавараабароту як мінімум да $1 млрд", - сказаў Андрэй Кабякоў.

Ён лічыць, што гэтага можна дабіцца, прытрымліваючыся дарожнай карты двухбаковага супрацоўніцтва Беларусі і Пакістана на перыяд 2015-2020 гадоў, якую сёння падпісалі прэм'ер-міністры дзвюх краін.

Таксама Андрэй Кабякоў падкрэсліў важнасць іншых падпісаных сёння дакументаў. "Адзначу міжурадавае пагадненне аб супрацоўніцтве і ўзаемнай дапамозе ў мытных справах і пагадненне аб узаемным прадастаўленні зямельных участкаў для размяшчэння пасольстваў. Падпісаны шэраг пагадненняў аб міжрэгіянальным супрацоўніцтве абласцей Беларусі з правінцыямі Пакістана", - канстатаваў кіраўнік беларускага ўрада.

Паводле слоў прэм'ер-міністра, беларускі бок зацікаўлены ў тым, каб на змену простаму гандлю прыйшла вытворчая кааперацыя. "У нас ёсць багаты вопыт работы з многімі краінамі па будаўніцтве і абсталяванні прамысловых і інфраструктурных аб'ектаў. Свой вопыт мы прапануем Пакістану, які актыўна мадэрнізуе прамысловы і аграрны сектары", - сказаў Андрэй Кабякоў. Ён канстатаваў, што Беларусь таксама бачыць магчымасці для ўзаемадзеяння ў галіне сельскай і лясной гаспадаркі.

Афіцыйны візіт прэм'ер-міністра Беларусі Андрэя Кабякова ў Ісламскую Рэспубліку Пакістан праходзіць 9-11 лістапада. Чакаецца, што сёння адбудзецца сустрэча кіраўніка беларускага ўрада з прэзідэнтам Пакістана. Таксама ў праграме візіту - адкрыццё Цэнтра беларускай культуры ў Нацыянальнай бібліятэцы Пакістана.

Пасля афіцыйнага візіту ў Ісламскую Рэспубліку Пакістан Андрэй Кабякоў 11-12 лістапада наведае з рабочым візітам Турэцкую Рэспубліку. Прадугледжваецца сустрэча прэм'ер-міністра Беларусі з кіраўніцтвам Турцыі, а таксама топ-менеджарамі турэцкіх кампаній.